"Sürix” bizim çempionatın orta sıralarında qərarlaşan komandalar kimi görünürdü" - Sənan Qurbanov
“Qarabağ” Çempionlar Liqasının 2-ci təsnifat mərhələsinin ilk oyununda İsveçrə çempionu “Sürix”lə qarşılaşdı.
Football-plus.az xəbər verir ki, xüsusən ilk yarıda aşkar üstünlüyə malik olan ağdamlılar sonda meydandan 3:2 hesablı qələbə ilə ayrıldı. Oyunsonrası mətbuat konfransında Qurban Qurbanov cavab matçına qələbə üçün çıxacaqlarını söylədi. Bu da “Qarabağ”sevərləri daha da ümidləndirdi.
Görəsən, Ağdam təmsilçisi mərhələni adlaya biləcək? "Köhlən atlılar" Sürixdəki görüşdə istədiyinə nail olacaq? Suallarımızı təcrübəli mütəxəssis Sənan Qurbanova ünvanladıq. Məşqçi üstünlüyün "Qarabağ"da olduğunu bildirdi:“Mən də ilk oyunu stadiondan izləyirdim. “Sürix”, əlbəttə, adlı-sanlı komandadı, əlavə təqdimata ehtiyacı yoxdu. İsveçrə təmsilçisinin heyıtində çox təcrübəli futbolçular da var. Bütün bunlara baxmayaraq, “Qarabağ” yenə bu komandaya qarşı öz oyun üslubunu sərgilədi. İlk 45 dəqiqə, demək olar ki, komandamızın tam üstünlüyü şəraitində keçdi. Rəqibi əməlli-başlı təzyiq altında saxladıq. Bunu görmək çətin deyildi. İki yox, daha çox qol vura bilərdik. Komandamız əməlli-başlı dominant futbol oynadı. Belə oyunları “Qarabağ”ın çempionatdakı digər komandalarla matçlarında görmürük. Əlbəttə, “köhlən atlar” premyer-liqada ən güclü komandadı desək, yanılmarıq. Amma son oyunda sanki “Sürix” bizim çempionatın orta sıralarında qərarlaşan komandalar kimi görünürdü. İkinci hissədə isə rəqib də topa sahib oldu. Qol vurmağa çox çalışdılar və standart vəziyyətdən fərqləndilər. “Qarabağ”ı səfərdə çox çətin oyun gözləyir. Amma mənə elə gəlir ki, komandamız bu oyun üslubuna sadiq qalsa, mərhələni keçən tərəf olacaq. İlk qarşılaşmadan sonra rəqibi daha yaxşı tanıdıq. Bu məsələni Qurban Qurbanov daha yaxşı bilir. Məncə, “Qarabağ” üstün oynayacağı oyunda mərhələni keçəcək. Üçüncü təsnifat mərhələsinə vəsiqə qazana bilməsə, əlbəttə, üzülərik. Lakin bu oyun üslübu davam edərsə, səfərdə də rəqibi təzyiq altında saxlayıb qələbə qazana bilərik. “Qarabağ” istənilən komandanın üzərinə getməyi bacarır. Komanda ilk oyunda daha çox qol vura bilərdi. Hazırda şanslar bərabər olsa da, məncə, üstünlük “Qarabağ”dadı. “Sürix”in son iki rəsmi oyunda 7 qol buraxması müdafiədə boşluqların olduğunu göstərir. Ona görə gözləyirəm ki, komandamız rəqib meydanında da qol vuracaq. Yenə deyirəm, “Qarabağ” növbəti mərhələyə keçməsə, bütün futbol ictimaiyyəti üzülər. Amma bu oyun üslübu davam etsə, rəqib meydanında da görüş “Qarabağ”ın üstünlüyü ilə keçəcək”.
