Səbuhi Səfiyarlı: “Qurban Qurbanov komandanın içindədi, hər şeyi bizdən daha yaxşı bilir”
Dünən Çempionlar Liqasının 2-ci təsnifat mərhələsi çərçivəsində "Qarabağ" səfərdə "Sürix"lə ağır oyun keçirsə də, sonda sevinən tərəf oldu.
Lakin "köhlən atlar"ın 2 aparıcı müdafiəçisi - Kevin Medina və Maksim Medvedev zədələndi, Kadi Borgeslə Riçard Almeyda isə cəzalı duruma düşdü. Dünənki nəticə ilə Ağdam təmsilçisi yalnız 3-cü mərhələyə yüksəlmədi, həm də Konfras Liqasının qrupunda yerini təmin etdi.
Görəsən, komanda heyətini gücləndirəcək? Ümumiyyətlə, buna ehtiyac var? "Football-plus.az" saytı olaraq bu suallara cavab tapmaq üçün tanınmış menecer Səbuhi Səfiyarlı ilə danışdıq:"Qarabağ"ın dünənki oyunu haqda əlavə şərhə ehtiyac görmürəm. Zatən Qurban Qurbanov və yetirmələri 120 dəqiqə meydanda nəyə qadir olduqlarını göstərdilər. Transferlərə gəlincə, sırf hansısa futbolçu zədələndi və cəzalı duruma düşdü deyə yeni oyunçu cəlb etmək düzgün deyil. Çünki hər bir futbolçu komandaya, baş məşqçinin sisteminə uyğunlaşmalıdı. Fikrimcə, "Qarabağ" hazırkı heyətlə də mübarizəni davam etdirmək gücündədi. Təbii ki, müəyyən mövqelərə transferlər olunsa, daha yaxşı olar. Hər halda, Qurban Qurbanov komandanın içindədi, hər şeyi bizdən daha yaxşı bilir. "Ferentsvaroş"la oyunda da yeni transferlərin olub-olmayacağı yox, meydanda kimin daha çox can qoyub döyüşəcəyi həlledici olacaq. "Qarabağ" dəfələrlə mübarizə əzmini göstərərək güclü rəqiblərindən üstünlüyünü nümayiş etdirib və bu tonusda da davam edəcək".
ABDULLA İSMAYILOĞLU
Digər xəbərlər
