Aqil Abbas: “Əminəm ki, “Sürix”i də tapdalayıb keçəcəklər” - AÇIQLAMA
“Qarabağ” srağagün "Lex"i darmadağın etdi.
Oyunsonrası mətbuat konfransına isə Qurban Qurbanovun Aqil Abbasla bağlı sözləri damğa vurdu. Bunu nəzərə alıb, millət vəkilinin fikrini öyrəndik.
Aqil bəy öncə oyunla bağlı danışdı:
“Qarabağ"dan qələbə gözləyirdim, amma darmadağınla yox. "Köhlən atlar" polşalıları əzib keçdi desək, daha ədalətli olar. Hamı sona qədər döyüşüb, qələbəyə töhfə verdi. Şahruddinin ağzıüstə uzanaraq topu sinəsinə sıxıb komanda yoldaşına göz vurmasından ayrıca ləzzət aldım. Bir səmimi etiraf da edim, "Qarabağ"ın heyətində ən çox tənqid etdiyim Abdulla Zubirdi. Həddən artıq fərdi oynayır, ya ötürmələri gec verir, ya da heç vermir. Amma onun da performansı xoşuma gəldi. Özünə də simpatiyam artdı. “Milliləşdirilənləri” də nəzərə alsaq, start heyətində 5 yerli futbolçu yer almışdı. Əvəzetmələrdən sonra daha 4-ü oyuna qoşuldu və meydandakı milli futbolçuların sayı 7 oldu. Bu dəyişiklik nəticəsində sevincimin həddi-hüdudu yox idi. Qurban Qurbanov 10 milyonluq xalqımıza böyük zəfər, coşqu, sevinc bəxş etdi. İnanıram ki, uğurun davamı gələcək və "Sürix"i də darmadağın edəcəyik”.
Aqil bəy "Lex"lə oyundan bir gün öncə Qurban Qurbanovu yuxuda gördüyünü də dilə gətirdi:
“Qurbanı yuxuda görmüşdüm. Gördüm ki, Ağdam, Əsgəran, Xocalı istiqamətində yol gedirik. Çox qəribədi ki, təxminən eyni gecə eyni yuxunu görmüşük. Mən də yuxudan durub onlar üçün dua etdim, qələbəmizi Allahdan istədim. Tanrı da duamızı eşitdi, rəqibi məğlub etdik. Düzdü, əvvəl dilxor oldum, lakin sonda qalib gəldik. Gözəl, qeyrətlə oynadılar. 90 dəqiqə ərzində rəqibi tapdalayıb keçdilər. Əminəm ki, “Sürix”i də tapdalayıb keçəcəklər”.
Millət vəkili "Qarabağ"ın güclənməli olduğunu da sözlərinə əlavə etdi:
“Bir rus yazıçı vardı, adını indi xatırlamıram. O deyərdi: 3 sahə var ki, insanlar burda özlərini hər şeyi bilən kimi göstərir və bəyanatlar verir. Bunlar futbol, kino və polis işidi. Məsələyə yazıçın dediyi ilə yanaşsaq, "Qarabağ"da yeni transferlərin vacibliyini hamı dilə gətirir. Düşünürəm ki, bir güclü mərkəz müdafiəçisi lazımdı. Medina öz mövqeyində sədd kimidi. Medvedev nə qədər yaxşı oynasa da, artıq yaş özünü göstərir. Baxmayaraq ki, kapitan "Lex"lə cavab oyununda ən yaxşılardan idi. Əminəm ki, Qurban müəllimin transferlərlə bağlı planları var. Mərkəz müdafiəçisindən başqa, qalan mövqelərə də futbolçu axtarır. Amma Medina ilə Maksimə kömək üçün daha bir müdafiəçinin alınması vacibdi”.
ABDULLA İSMAYILOĞLU
Digər xəbərlər
