Bu yaxınlarda “Football-plus.az” saytına açıqlama verən Rüstəm Əliyev sənəd üzərində “Şamaxı”nın baş məşqçisi olsa da, klubun yeni rəhbərliyinin onunla əlaqə saxlamadığını demiş, Cavid Hüseynovun “sükan arxasına” gətirilməsini bir növ qeyri-qanuni addım kimi dəyərləndirmişdi. Onun bu açıqlamasından sonra bölgə təmsilçisinin rəsmiləri Əliyevlə əlaqə saxlayıb məşqçilər korpusunda işlə təmin ediblər.
Bu məqamla bağlı redaksiyamıza ilginc məlumat daxil olub. Belə ki, Cavid bəy Əliyevin təyinatının əleyhinə olub və rəhbərliyə etirazını bildirib. Ancaq rəsmilər ortada anlaşmanın olduğunu, müqavilə şərtləri yerinə yetirilmədiyi halda gələcəkdə bunun acısını çəkə biləcəklərini Hüseynovun diqqətinə çatdırıblər. Hətta bu da 34 yaşlı məşqçini fikrindən daşındırmayıb. Belədə funksionerlər növbəti qalmaqaldan çəkinərək çoxlarını təəccübləndirəcək addım atıblar. Aylıq məvacibi 4 min manat olan Əliyevlə söhbət edərək, birillik müqavilənin müddətini daha bir il uzadaraq, ona ayda 2 min manat ödəyəcəklərini bildiriblər. Yəni Əlyev “Şamaxı”da heç bir iş görmədən iki il müddətində bölgə təmsilçisindən 2 min manat alacaq.
RƏŞAD