“Şamaxı”nın yeni baş məşqçisinin Cavid Hüseynovun olacağı ictimaiyyətə bəlli olsa da, nədənsə, klub rəhbərliyi hələ ki, bu təyinatı rəsmi açıqlamır.

Gənc çalışdırıcının yeni klubunda köməkçiləri də məlumdu. 34 yaşlı mütəxəssis “Cəbrayıl”da bir yerdə çalışdığı Elhad Nəziri, qardaşı Şərafəddin Hüseynovu da yanına aparıb. “Şirlər”in məşqçilər korpusunda adlarını çəkdiklərimizlə yanaşı Vüqar Əsgərov və qapıçılar üzrə məşqçi Anar Niftəliyev də yer alıb.

Son günlər kuluarlarda Cavid bəyin fiziki hazırlıq üzrə mütəxəssis axtardığı, hətta onun xaricdən dəvət olunacağı ilə xəbərlər dolaşırdı. Bu məsələ ilə bağlı “Football-plus.az” saytına etibarlı mənbədən məlumat daxil olub. Əldə etdiyimiz bilgiyə əsasən Hüseynovun məşqçilər korpsunda fiziki hazırlıq üzrə məşqçi funksiyasını Kaxaber Tsxadadzenin yanında çalışmış Miloş Yevtiç yerinə yetirəcək, ancaq bir müddət qeyri-rəsmi. Belə ki, Yevtiç Tsxadaze ilə birgə Tiflis “Dinamo”sundan ayrılsa da, təzminat məsələsində hələ ortaq məxrəcə gələ bilməyiblər. Bu üzdən serb mütəxəssisin “Dinamo” ilə anlaşması qüvvədən düşməyib. Məhz bu səbəbdən də onun “Şamaxı” ilə rəsmi müqavilə bağlaması indiki halda qeyri-mümkündü.

RƏŞAD