Türkiyə yığmasının üzvü Yusuf Yazıcının gələcək taleyi hələ də qeyri-müəyyəndi.

Qəribədi ki, legionerlər Rusiyanı tərk etməyə həvəs göstərdiyi halda, Yusuf bu ölkədə qalmaq üçün dəridən-qabıqdan çıxır! Bilindiyi kimi, müqavilə ilə ''Lill''ə məxsus olan 25 yaşlı vinger ötən mövsümün ikinci dövrəsini icarə əsasında ÇSKA-da keçirərək 12 rəsmi oyunda 8 qol, 2 məhsuldar ötürməlik performans sərgilədi. Yazıcı həm ''Trabzonspor''un çempionluq tədbirində iştirak etmək, həm də müxtəlif reklam çarxlarında çəkilmək üçün son günlər Türkiyədədi. Onun taleyini isə meneceri Ahmet Cebeci həll edir. Əslində ÇSKA bu futbolçu ilə daimi əsasda müqavilə imzalamağın əleyhinə deyil. Amma ''hərbçilər'' ''Lill''in tələb etdiyi 11,5 milyon avroluq təzminatın həddən artıq böyük məbləğ olduğunu düşünür. Onlar qarşı tərəfə ən yaxşı halda 7-8 milyon avro ödəməyi təklif edib. ÇSKA-nın baş direktoru Roman Babayev bildirib ki, danışıqlar davam etsə də, tərəflər hələlik anlaşma əldə etməkdən çox uzaqdı.

Bu arada Rusiya mətbuatında çıxan xəbərlərdə qeyd olunub ki, Yusuf Yazıcı meneceri tərəfindən ''Zenit''ə təklif olunub. Futbolçunun piterlilərin gündəminə düşməsi ilə bağlı xəbər 1-2 həftə öncə də var idi. Amma o vaxt ''Zenit''in baş direktoru və ''Qazprom'' şirkətinin idarə heyətinin üzvü Aleksandr Medvedev Yusufun xidmətində maraqlı olmadıqlarını demişdi. Az qala hər gün futbolçusunun durumu ilə bağlı Rusiya mətbuatına açıqlamalar verən menecer Ahmet Cebeci dünən yenə danışıb:

''Zenit'' son illərin dəyişməz çempionu və yetərincə güclü klubdu. Orda hər şey ən yüksək səviyyədə təşkil olunub. Üstəlik Türkiyədə əfsanələrdən sayılan Fatih Təkkə də vaxtilə ''Zenit''də oynayıb. Bu kluba böyük hörmətimiz var. Amma mənimlə onların heç bir rəsmisi əlaqə saxlamayıb. Futbolda hər şey çox ani şəkildə dəyişə bilir və gələcəkdə nə olacağını demək çətindi. Amma bizim üçün etik deyərlər də çox önəmlidi. Bu üzdən ÇSKA ilə məsələni həll etməmiş başqa klublarla danışıqlar aparmayacağıq. Yəni bu komanda bizim üçün prioritetdi. ÇSKA-da hər kəs Yusuf sevir və hörmətlə yanaşır. Yusuf da bu klubu sevir və karyerasını burda davam etdirmək arzusundadı. ''Lill''ə qayıtmaq istəmir. Biz hələ də inanırıq ki, ÇSKA ilə fransızlar arasında razılıq əldə olunacaq. Qəlbimizdə olan klub məhz ÇSKA-dı. Bir neçə gündən sonra bu məsələ ilə bağlı sizə daha konkret açıqlamalar verə biləcəm''.

Sonda qeyd edək ki, türkiyəli futbolçunun Fransa təmsilçisi ilə 2024-cü ilə qədər müqaviləsi var.