Rusiyanın “Torpedo” klubundan ayrılan futzal üzrə milli komandamızın qapıcısı Rövşən Hüseynlinin “Araz-Naxçıvan”a qayıtmaq ehtimalı var idi.

Komandanın vitse-prezidenti Mahmud Sadıqov qapıçının legioner həyatı yaşamaq istədiyini bildirmişdi. Görəsən, Rövşən hansı komanda ilə razılığa gəlib? Bu haqda məlumat almaq üçün Mahmud Sadıqovla əlaqə saxladıq. Onun “Football-plus.az” saytına açıqlaması belə oldu:

“Hələ də bizdədi. 90 faiz “Araz-Naxçıvan”da qalacaq. Düzdü, özü legioner həyatı yaşamaq istəyir. Mənə 10 günə qərar verəcəyini demişdi. İki gün öncə danışdıq, yenə 3-4 gün vaxt istədi. Həftəsonuna kimi dəqiq qərarını verəcək. Amma danışığından belə başa düşdüm ki, bizdə qalacaq”.

Görəsən, komandada başqa hansı yeniliklər var? Klub yeni transferlər edib? Mahmud Sadıqovu eşidək:

“4 braziliyalı ilə danışıqlar gedir. Onlarda çempionat hələ davam etdiyinə görə razılığa gəlmək üçün bir az çətinlik çəkirik. Amma əlavə olaraq 4 oyunçu ilə danışıqlarımız davam edir. Çox güman, iyulun əvvəlində dördünün də keçidi reallaşacaq. Heyətdə olanlardan isə Felipinyo və David Qustavo bizimlə qalır. Yanvardan sonra komandanı tərk edən futbolçu olmayıb. Ramiz Çovdarov, Xətai Bağırov, İsa Atayev, Fərid Ələkbərov da komandada qalır. Əlavə olaraq U-19 yığmasından Məhəmməd Abbasovla Xəzər Ağazadəni heyətə cəlb etmişik. Bir də “Neftçi” İK-in gənc qapıcısı Cavad Məmmədovun transferini gerçəkləşdirmişik. O da perspektivlidi, həm də milli komandanın 3-cü qapıcısıdı. U-19 millisinin əsas qapıcısı Azər Fərmanzadəni də komandada saxlayırıq. İyulun 15-də bunlarla razılıq əldə olunub. Məqsədimiz odu ki, həm güclü kollektiv yaradaq, həm də gənc nəsildən bir neçəsini transfer edərək yetişdirək. Artıq bəzi futbolçularımızın yaşı 30-dan yuxarıdı deyə, onları əvəz edəcək futbolçular hazırlamaq lazımdı. Bu yükü “Araz-Naxçıvan” olaraq öz üzərimizə götürdük”.

ŞAİR ABDULLA