İtaliya təmsilçisi ''Sampdoriya'' ''Beşiktaş''ın gənc mərkəz müdafiəçisi Sərdar Saatçıya maraq göstərir.

Genuyalılar artıq futbolçunun meneceri ilə əlaqə saxlayaraq onun dəyəri ilə maraqlanıblar. Son dönəmlərdə bu futbolçunu diqqət mərkəzində saxlayan ''Sampdoriya'' rəsmilərinin gələn ay ''Beşiktaş''a rəsmi təklif irəli sürəcəyi gözlənilir. İstanbul nəhənginin öz yetirməsi olan 19 yaşlı futbolçunun klubla 2023-cü ilə qədər müqaviləsi var. Düzdü, Sərdar əsas heyət üzvü sayılmır. Amma bu futbolçu ötən mövsüm şans qazandığı matçlarda inamlı oyunu ilə diqqəti çəkməyi bacarmışdı. Sərdar 2021/22-də ümumilikdə 14 rəsmi oyuna çıxaraq 1 qol, 1 məhsuldar ötürmə ilə yadda qalıb. ''Beşiktaş'' rəhbərliyi dəyəri təxminən 1,6 milyon avro civarında olan bu futbolçunun satışından 2-3 milyon avro gəlir əldə etməyi planlaşdırır. Bu arada İtaliya mətbuatının yazdığına inansaq, ''Sampdoriya'' ''Beşiktaş''la yoxlama matçı keçirəcək. Bu oyun iyulun 30-da ''Vodafon Park''da baş tutacaq və yerli vaxtla saat 19.00-da başlayacaq. İtalyanların məhz həmin vaxt fürsətdən istifadə edərək Sərdarın transferini tamamlayacağı gözlənilir. Bu qarşılaşma həm də onunla əlamətdar olacaq ki, ''Sampdoriya'' tarixində ilk dəfə Türkiyədə oyuna çıxacaq.

Yeri gəlmişkən, ''ağ-qaralar''ın yeni mövsümə hazırlığı barədə də məlumat verək. İstanbul nəhəngi Valerien İsmaelin başçılığı altında hazırlığa iyunun 27-dən etibarən start verəcək. Komanda xaricdə iki toplanış keçəcək. Bunlardan birincisi iyulun 5-16-da Avstriyanın Bad Herinq bölgəsində, ikincisi isə iyulun 20-27-də İspaniyanın Alikante şəhərində baş tutacaq. ''Beşiktaş'' İspaniyada iki yoxlama matçı keçirəcək. Komanda iyulun 23-də ''Vulverhempton''la, 26-da ''Alaves'' ilə qarşılaşacaq.