Yanvarın 14-də Fatih Terimin əvəzinə ''Qalatasaray''ın başına gətirilən və ilyarımlıq müqaviləyə imza atan Domenek Torrent bu vəzifədə 4-cü ayını belə tamamlamadan qovulmaq üzrədi.

Kataloniyalı mütəxəssis komandanı uğursuzluq zolağından çıxara bilməməsi azmış kimi verdiyi açıqlamalarla nəinki fanatları, hətta onu bu posta gətirən başqan Burak Elmasın da səbrini tükəndirib.

Bilindiyi kimi ''Qalatasaray'' son turda doğma meydanda ''Sivasspor''a məğlub oldu. Bu, 59 yaşlı çalışdırıcının bu vəzifədə keçirdiyi 17-ci rəsmi oyundakı 8-ci məğlubiyyəti oldu (6 qələbə, 3 heç-heçə). Torrent adəti üzrə oyundan sonra komandasını qol fürsətlərindən yararlana bilməməkdə günahlandırdı. Bundan başqa Torrent bu dəfə bir qədər də irəli gedərək yanvarda tamamilə boş və hətta analiz üzrə məşqçisinin belə olmadığı bir komandanı qəbul etdiyini deyərək həmin ''Qalatasaray''ı düşməkdə olan təyyarəyə bənzətdi. İstanbul nəhəngini az da olsa, bu vəziyyətdən çıxartdığını deyərək bir növ minnət qoyan məşqçi eyni zamanda müqaviləsinin sonuna qədər klubda qalmaq istədiyini təkrarladı. Elmasın bu sözləri həm camiəni, həm də Burak Elması cin atına mindirdi. Artıq məşqçinin meneceri Xose Maria Orobitq dünən İstanbula dəvət olunub. Elmas 1,7 milyon avroluq təzminatı mümkün olduğu qədər aşağı salaraq Torrentlə yollarını ayırmaq istəyir. Türkiyə mətbuatının yazdığına inansaq, təzminat məsələsində anlaşma əldə olunsa ''Qalatasaray'' mövsümün qalan 3 oyununa Hakan Baltanın başçılığı altında çıxacaq. Balta hazırda ''Qalatasaray''ın U-19 komandasını çalışdırır. ''Cim-Bom''un son 3 turda ''İstanbul BŞ'', ''Adana Dəmirspor'' və ''Antalyaspor''la qarşılaşacağını bildirək.