Məlum olduğu kimi Domenek Torrent ''Qalatasaray''ın yeni rəhbərliyi ilə təzminat məsələsini həll etmək üçün dünən İspaniyadan İstanbula gəldi.

Klubla hələ birillik müqaviləsi olan 59 yaşlı mütəxəssisin təzminatı 1,5 milyon avrodu. Türkiyə mətbuatının yazdığına inansaq, başqan Dursun Özbək ilə məşqçi arasındakı ilk görüş o qədər də uğurlu alınmayıb. Özbək əvvəlcə məbləği aşağı salmağa çalışsa da istəyinə çata bilməyib. Daha sonra Özbək 1,5 milyon avronu 10 hissəyə bölərək ödəməyi təklif edib. Torrent bu təklifi də rədd edib! Kataloniyalı mütəxəssislə rəhbərlik arasında ikinci bir görüşün keçiriləcəyi gözlənilir. Təzminat məsələsi həll olunduqdan və Torrentlə yollar ayrıldıqdan sonra ''Cim-Bom'' Okan Burukla müqavilə imzalayacaq.

Bu arada ''sarı-qırmızılar''ın yolları ayırdığı idman direktoru Paskuale Sensibileyə ödədiyi təzminat məlum olub. Fevralın 7-də bu vəzifəyə gələn və cəmi 123 gün işləyən italiyalı futbol adamına 660 min avro təzminat ödənilib. Sensibilenin yerinə idman direktoru vəzifəsinə Cenk Ərgün gətirilib.