Bu gün 1061 dollara nə almaq olar?

Məsələn, maksimal yaddaşı olan “IPhone 13” və ya son model “Sony PlayStation”. Amma Stenli kubokunun “Tampa-Bey” ilə “Kolorado” arasındakı final seriyasını izləmək istəyən azarkeşlər bir oyun üçün məhz bu qədər xərcə düşür.

Denver bu finalı 21 il idi gözləyirdi. Əvvəlki mərhələləri birnəfəsə keçən “Kolorado”nun bəxtinə son mövsümlərin ən prinsipial rəqibi - Con Kuperin komanda-dinastiyası olan “Tampa-Bey” çıxdı. Seriyanın ilk oyunlarına biletin qiyməti hədsiz yüksəkdi. MHL çoxdan belə qiymətlər görməyib. Stenli kubokunun finalı “Kolorado”nun arenasının son illərdə qəbul etdiyi ən bahalı tədbirdi. Denverdəki çoxfunksiyalı “Ball Arena” dünya səviyyəli ifaçıların konsertlərini qəbul edib. Amma “Tampa-Bey”lə oyunun biletləri Adelin 2016-dakı (468 dollar) və Puerto-Rikodan olan repçi Bed Banninin 2022-dəki (341) konserti ilə müqayisədə daha bahadı.

Son 10 ildə Stenli kubokunun finalı üçün ən baha biletlər

il seriya şəhər biletin orta qiyməti

2022 Kolorado – Tampa Denver 1061
2018 Vaşinqton – Veqas Paradays 951
2019 Boston – Sent-Luis Boston 779
2021 Tampa – Monreal Tampa 578
2014 Los-Anceles – Reyncers Los-Anceles 512

Alverçilər də iş başındadı. Amerikalı həmkarlarımız yazır ki, “qara bazar”da biletlərin qiyməti 750-5250 dollar arasında dəyişir. Tampada keçiriləcək 3-cü oyuna arenada baxmaq istəyənlər daha az xərcə düşəcək. “Amalie Arena”da hokkey biletləri 51-2680 dollar arasında dəyişir.

Bəs MBA-da vəziyyət necədi?

Hokkey oyunlarına biletlər MBA finalı ilə müqayisədə “toya getməlidi”. MHL-in biznes-maşını basketbolla Amerika futboluna açıq-aşkar uduzur. Məsələn, “Boston”la “Qolden Steyt” arasındakı final seriyası üçün biletlərin “qara bazar”dakı orta qiyməti 3241 dollar olub. “Uorriorz”un ev oyunlarına biletin orta qiyməti 3256, “Seltiks”in ev oyunlarına biletin orta quyməti isə 2860 dollar idi. Təbii ki, ABŞ-da əsas basketbol olayları ətrafındakı ajiotaj hokkey olayları ilə müqayisədə daha yüksəkdi. Teleyayın hüququ, reklam müqavilələri və klubların ümumi dəyəri ilə bağlı statistika da bunu təsdiq edir.

Ciddi gəlir

MBA ilə rəqabətdə uduzmalarına baxmayaraq, Stenli kubokunun finalçıları da bu seriyadan ciddi gəlir əldə edirlər. Hətta seriya ilk 4 oyunda bitsə də belə. “Ball Arena”nın tutumu 18007-di. Tampadakı “Amalie Arena” isə 19500 azarkeş üçün nəzərdə tutulub. Tribunalar tam dolacağı təqdirdə (yuxarıda qeyd etdiyimiz orta qiymətə əsasən) “Kolorado” təkcə bir ev oyununa bilet satışından 19 milyon dollardan artıq pul qazanır. Bu isə klubun maaş cədvəlinin təxminən dörddəbirini təşkil edir. İlk iki oyunun “Ball Arena”da keçirildiyini nəzərə alsaq, “Kolorado” artıq 38 milyon qazanıb.

Ən vacib oyunlara da biletsiz getməyə üstünlük verən azərbaycanlı azarkeşlər üçün belə bilet qiymətləri, təbii ki, ağlasığmaz görünür. Özü də klubların qazancı təkcə bilet satışı ilə məhdudlaşmır. Keyterinq, parklama və atribut satışı da var – bunsuz hokkey bayramının nə ləzzəti! Onu da xatırladaq ki, Denverdə aylıq orta maaş vergilər çıxılmadan 8 min dollardı.