“Neftçi”nin futbolçusu Samir Abasovun gedişinə sevinib?
Dünən “Neftçi”də Samir Abasov dönəmi rəsmən başa çatdı.
Müşahidə Şurasının iclasında flaqmana 8 il sonra çempionluq sevinci yaşadan mütəxəssisə növbəti mövsüm üçün etimad göstərilmədi. Qərarın açıqlanmasından bir neçə dəqiqə sonra “ağ-qaralar”ın futbolçusu Rəhman Hacıyevin “instaqram” hesabında paylaşdığı bu “hekayə” diqqəti çəkdi.
Ötən mövsümü icarə əsasında “Şamaxı”da keçirən futbolçunun “Come back home” - “Evə qayıdış” yazılan şəkli paylaşmasına səbəb nə olub? Bunu öyrənmək üçün Rəhman Hacıyevlə danışmağa qərar verdik. Onun “Football-plus.az” saytına açıqlaması belə oldu:
“Samir müəllimin gedişi ilə bağlı heç nə deyə bilmərəm. Klub rəhbərliyi bu qərarı verib. Əslində mənə nəsə demək düşməz. Baş məşqçi dekabrda qayıtmağımı istəyirdi. Ancaq “Şamaxı” ilə müqaviləm olduğuna görə bu mümkün olmadı. O ki qaldı şəkilə, bunu fanatım öz səhifəsində paylaşmışdı. Mən də onu paylaşdım. Burda qeyri-adi nəsə, prinsip yoxdu. “Samir Abasov gedib, Rəhmanın geri dönməyini istəyirik” mənasını verir. Belə mesajlar dünəndən gəlir. Bunun Samir müəllimə heç bir aidiyyatı yoxdu. Prinsip söhbəti ola bilməz. Baş məşqçim olub. Bir komandada çalışmışıq. “Neftçi” ilə yolları ayrılıb. Ona gələcək karyerasında uğurlar arzulayıram. İnşallah, bundan sonra hər şey onun üçün daha da yaxşı olar”
Rəhman “Neftçi”də qalıb-qalmayacağına belə aydınlıq gətirdi:
“Neftçi”də qalıb-qalmayacağım hələ dəqiq deyil. Təkliflər var. Onlardan birini dəyərləndirmək məcburiyyətindəyəm. Ya qalacam, ya da gedəcəm. 2-3 günə aydınlıq gələcəcək”.
SƏNƏM FƏRHADOVA
Digər xəbərlər
