Çoxdan gözlədiyimiz Millətlər Liqası bizim üçün sabah start götürəcək.

Ən azı adlara baxanda komandamızın normal qrupda yer aldığını deyə bilərik. Doğrudu, Latviya və Maltaya qarşı keçirdiyimiz son iki yoldaşlıq oyunu bu fikirlərin üstündən hardasa xətt çəkdi. Görünür, Canni de Byazi bizdən fərqli bu matçlara dəvət etdiyi futbolçulardan razı qaldığından bu dəfə də böyük ölçüdə həmin oyunçuları çağırıb.

Sadəcə, bizim üçün qaranlıq qalan bəzi məqamlar var. Onlardan birincisi uzun müddətdi zədə səbəbindən yaşıl meydanlardan uzaq qalan, Qazaxıstan çempionatında cəmi 1 oyuna çıxan Emil Balayevin 3 qapıçıdan biri kimi yığmaya dəvət edilməsidi. İkinci məqam Riçard Almeyda kimi maksimum 5 dəqiqə meydanda normal oynamaq gücünə malik futbolçuya yığmanın qapısının açılmasıdı. Üçüncü məqam cari mövsümdə 127 dəqiqə oynamaq fürsəti tapan Bədavi Hüseynovun müdafiəyə güvən vermək üçün çağrılmasıdı. Dördüncü isə Dimitri Nazarovdu. Onun haqda, ümumiyyətlə, danışmağa ehtiyac görmürük.

Bu məsələni həmkarlarımızla müzakirə etməyi lazım bildik. "Sportal.az" saytından Mirbağırağa Cəfərlinin mövzu ilə bağlı "Football-plus.az" saytına açıqlaması belə oldu:


“Vəziyyət elədi ki, milliyə kiminsə çağrılıb-çağrılmamasının fərqi yoxdu. Çünki görünən odu ki, ab-hava yaxşı deyil, ortada konkret oyun planı, normal oyun yoxdu. Özü də bizim Levandovskimiz, Ronaldomuz yoxdu ki, kimisə çağırsa və ya çağırmasa, böyük fərq etsin. Aşağı-yuxarı eyni səviyyədə olan futbolçulardı. Buna baxmayaraq, təbii ki, müzakirə olunacaq adlar var. Riçard Almeyda ilə Dmitri Nazarovun milliyə çağrılmasına, yəqin ki, heç kim izah verə bilməz. Hətta Canni de Byazinin özü də. Qapıçı seçimini də anlamaq çətindi. Səlahət Ağayev oynamırdı son vaxtlar. Emil Balayev də cəmi bir matça çıxıb. Yəni nə oyun praktikaları var, nə də hazırdılar. Hər halda, milli klublarında oynamayanlar üçün praktika yığmaq, “artırmaq” üçün yer deyil. Başqa klublardakı yerliləri dəvət etmək olardı. Futbolçularımızın legioner həyatı yaşamasına sevinirik. Amma Namik, Dmitri və Renatın komandası aşağı diviziona yuvarlandı. Deməli, hələ də çox sevinməməliyik ki, oyunçularımız legioner həyatı yaşayır”.

SƏNƏM FƏRHADOVA