Malta toplanışı milli üçün rüsvayçılıqla başa çatdı.

Komanda hər iki oyunda dünya reytinqində özündən aşağı pillələrdə qərarlaşan Malta və Latviyaya uduzdu. Halbuki yığmaya dəvət olunan futbolçuların adlarını görüb nələrəsə ümid etmişdik. Amma “sən saydığını say, gör fələk nə sayır”...

İdman ictimaiyyətinin böyük əksəriyyəti düşünürdü ki, Şahruddin Məhəmmədəliyevlə Emil Balayevin yoxluğunda “çərçivə”də problemlər olacaq. Amma zənnimiz bizi yanıltdı. Həm də çox. İki oyunda da komandanın ən yaxşısı, sözsüz, Səlahət Ağayev oldu. Təcrübəsi və inamlı çıxışı ilə bəlkə də çoxdan gözlədiyi fürsətdən ən gözəl şəkildə istifadə etdi. Görünür, qapıçının çıxışı təkcə mənim yox, millinin baş məşqçisi Canni de Byazinin də diqqətini çəkib. Mütəxəssis hər iki qarşılaşmadan sonra baş tutan mətbuat konfransında Səlahəti yaxşıca təriflədi. Hətta Malta ilə qarşılaşmadan sonra bu sözlərlə ona inamını göstərdi:

Bu cümlənin altında gizli məna yatır. İtaliyalı çalışdırıcı klublarındakı çıxışları ilə “göz qamaşdıran” futbolçuları bu toplanışa dəvət etmişdi. Ağayev də bunlardan biridi. O, Stamenkoviçin gedişindən sonra “Sabah”ın əsas qapıçısına çevrilib. Qısa müddətdə inamlı oyunu ilə mediadan daha çox De Byazinin diqqətini çəkməyi bacarıb. Masazır təmsilçisinin oyunlarında millinin baş məşqçsinin gözü həmişə Səlahətin üzərində idi.


Bəndənizin bundan çıxardığı nəticə mütəxəssisin yığmaya yeni “1 nömrə” axtarışında olmasıdı. Şahruddinin zədə səbəbindən 3 aydan çoxdu yaşıl meydanlardan uzaq qalması buna əsas səbəbdi. Ancaq bunun da pərdəarxası məqamı var. Ötən ilin noyabrında De Byazi “CBC Sport”da qonaq olarkən aparıcı ona Şahruddinin yığmanın baş məşqçisi postuna Rəşad Sadıqovun layiq olduğunu söylədiyini çatdırmışdı. Təbii ki, bu məşqçinin heç də xoşuna gəlməmişdi və o, “düşünürəm ki, Şahruddin daha çox öz işinə diqqət ayırmalıdı” cavabını vermişdi. Fikrimcə, De Byazi məhz Məhəmmədəliyevin bu açıqlamasından sonra onu “gözdən çıxardı”. Təbii ki, “Qarabağ”ın qapıçısının uzun müddətə sıradan çıxması da millidəki mövqeyini itirməsiylə nəticələndi. Mövsümün ikinci yarısının böyük hissəsini zədə səbəbindən buraxan bir qapıçının iyunda start götürəcək Millətlər Liqasınında “1 nömrə” olacağı, fikrimcə, inandırıcı deyil. Həmçinin DÇ-2022-nin seçmə mərhələsində yol verdiyi kobud səhvlər də De Byazinin Şahruddinə onsuz da az olan inamını daha da azaltdığını düşünürəm. Emilin vəziyyəti isə hamıya aydındı. Uzun müddətdi ehtiyyatda qalan qolkiperin bu ilin əvvəlində zədələnməsi milliyə yolunu ən azı bu tsikl bağlayıb. Geridə isə qış mövsümündən bəri ən az qol buraxan “Zirə”dən Mehdi Cənnətov, “Qəbələ” və U-21-in qapıçısı Nicat Mehbalıyev və “Sabah”dan Səlahət Ağayev qalır...

Nicatın Millətlər Liqasında əsas qapı olmaq şansı çox azdı. Həm gənc və təcrübəsizdi, həm adi səhvlərlə yadda qalıb (“Sabah”, “Qarabağ” və “Neftçi”yə qarşı oyunlar), həm də qış fasiləsindən bəri çoxlu qol buraxıb. Bu isə onun əsas yığmaya yolunu bağlayır.

Mehdinin Millətlər Liqasında yer alacaq qapıçıların siyahısında olacağını düşünürəm. Amma onun da davamlı meydana çıxmaq şansı çox deyil. Səbəb milli təcrübəsinin azlığı və meydanda qapıçıya xas liderlik, komanda yoldaşlarına istiqamət vermək bacarığının olmamasıdı.

Fikrimcə, yığmanın yeni “1 nömrə”si məhz Səlahətdi və o da olmalıdı. Yuxarıda adı çəkilən qapıçılarda olmayan milli təcrübə, meydandakı özgüvən, liderlik və komanda yoldaşlarına istiqamət vermək bacarığı bu qolkiperdə var. Malta toplanışındakı uğurlu performansı da bunun sübutu idi. Həmçinin “Sabah”dakı inamlı oyunu ilə də yaxşı və güvəniləcək təsir bağışlayır. Görünən odu ki, De Byazi də ondan razı qalıb və Millətlər Liqasında yığmanın qapısını məhz Səlahətə tapşıracaq.


SƏNƏM FƏRHADOVA