Çoxdan gözlədiyimiz Millətlər Liqası bizim üçün sabah start götürəcək.

Ən azı adlara baxanda komandamızın normal qrupda yer aldığını deyə bilərik. Doğrudu, Latviya və Maltaya qarşı keçirdiyimiz son iki yoldaşlıq oyunu bu fikirlərin üstündən hardasa xətt çəkdi. Görünür, Canni de Byazi bizdən fərqli bu matçlara dəvət etdiyi futbolçulardan razı qaldığından bu dəfə də böyük ölçüdə həmin oyunçuları çağırıb.

Sadəcə, bizim üçün qaranlıq qalan bəzi məqamlar var. Onlardan birincisi uzun müddətdi zədə səbəbindən yaşıl meydanlardan uzaq qalan, Qazaxıstan çempionatında cəmi 1 oyuna çıxan Emil Balayevin 3 qapıçıdan biri kimi yığmaya dəvət edilməsidi. İkinci məqam Riçard Almeyda kimi maksimum 5 dəqiqə meydanda normal oynamaq gücünə malik futbolçuya yığmanın qapısının açılmasıdı. Üçüncü məqam cari mövsümdə 127 dəqiqə oynamaq fürsəti tapan Bədavi Hüseynovun müdafiəyə güvən vermək üçün çağrılmasıdı. Dördüncü isə Dimitri Nazarovdu. Onun haqda, ümumiyyətlə, danışmağa ehtiyac görmürük.

Bu məsələni həmkarlarımızla müzakirə etməyi lazım bildik. İTV-nin İdman Departamentinin rəhbəri Kənan Hakimovun mövzu ilə bağlı "Football-plus.az" saytına açıqlaması belə oldu:

“Emil Balayev uzun müddət meydanlardan uzaq idi. Yeni komandasında cəmi 1 matça çıxıb. Səlahət Ağayevə gəlincə, o da oyun praktikasının azlığından əziyyət çəkir. Düşünürəm ki, Şahruddin Məhəmmədəliyev əsas seçim olmalıdı. Müdafiəçilərdən Amin Seydiyev dəvət oluna bilərdi. Uğurlu mövsüm keçirib. Çağrılsaydı, daha yaxşı olardı. Yarımmüdafiədə isə Elvin Camalov ola bilərdi. O da pis çıxış etməyib. Təəssüf ki, həmişəki kimi bu dəfə də “Qəbələ”dən heç bir futbolçu milliyə dəvət edilməyib. Orda da yaxşı oyunçular var. Ən azı kimisə çağırmaq mümkün idi. Təbii ki, heyətdə hər kəs kimi, mənim də diqqətimi iki futbolçu çəkdi: Riçard Almeyda və Dimitri Nazarov. Bu futbolçuların çağrılmasını dəstəkləmirəm. “Qarabağ” belə Almeydanın xidmətindən yararlanmır. Amma nəyə görəsə De Byazi hələ də onu milliyə dəvət edir. Bunu anlamıram. Nazarovla Almeyda kimi futbolçular artıq yığmaya çağrılmalı deyil. Milli komandaya verəcək nələrisə qalmayıb”.

SƏNƏM FƏRHADOVA