“Cəbrayıl” hər cəhətdən 1-ci divizonda çıxış etməyə hazırdı"
Region Liqasında uzun marafon ötən həftə başa çatdı.
“Cəbrayıl” “Xan Lənkəran” üzərində 1:0 hesablı qələbə qazanaraq çempion oldu. Qarşılaşmadan sonra “Futbol+”ə müsahibə verən Cavid Hüseynov komandasının növbəti mövsüm 1-ci divizionda oynayacağına ümid etdiyini söylədi. Lakin AFFA-nın baş katibi Sərxan Hacıyev qəzetimizə müsahibəsində bu məsələdə hansısa yeniliyin gözlənilmədiyini qeyd etdi. Yaxın vaxtlarda AFFA İcraiyyə Komitəsinin iclasının olacağı gözlənilir. Görəsən, “Cəbrayıl”ın prezidenti və baş məşqçisi 1-ci divizionla bağlı hansısa yeniliyin olacağına ümid edir? Qurum onlara xüsusi güzəşt edə bilər?
Cavid Hüseynovun suallara cavabı belə oldu: “Bir dəfə İcraiyyə Komitəsinin qərarı ilə üç klub - “Araz Naxçıvan”, “Mingəçevir” və “İmişli” 1-ci divizionda iştirak haqqı əldə edib. Müsahibəmdə demişdim ki, 1-ci divizionda iştirak edəcəyimizlə bağlı içimdə rahatlıq var. Bu haqda hansısa məlumatım yoxdu. Lakin klub kimi formalaşmağımız bunu deməyimə əsas verir. Düşünürəm ki, “Cəbrayıl” hər cəhətdən 1-ci divizonda çıxış etməyə hazırdı. Hər şey göz önündədi. Klub kimi necə peşəkar fəaliyyət göstərdiyimiz də hamıya bəllidi. Divizionda çıxış edənlərin əksəriyyəti bizə çatmır. Bu baxımdan özümdə rahatlıq hiss edirəm. Biz kollektiv olaraq buna hazırıq. Rəhbərlik səviyyəsində iclaslarda da deyirəm ki, bizim üçün 1-ci divizionda çıxış edib-etməməyin fərqi yoxdu. Amma buna həmişə hazır olmalıyıq. İşimizə pəşəkar yanaşmalıyıq. Çünki hər an hansısa yenilik və ya fikir dəyişikliyi ola bilər. Ola bilər ki, 1-ci diviziona 4 klub gəlsin. O zaman biz klub olaraq buna hazır olmalıyıq. Buna görə adımız 1-ci sırada olmalıdı. Bunlar bizdə hazır olduğu üçün özümü rahat hiss edirəm. Bu şəxsi fikrimdi, hardansa, kimdənsə qaynaqlanmır”.
Klub rəhbəri UEFA Region Kubokuna hazırlıq barədə də danışdı. Gənc mütəxəssis heyət baxımından çətinlik çəkəcəklərini dilə gətirdi: “Neçə gündü bu işlərlə məşğuluq. Həqiqətən də böyük çətinliklərimiz var. Çünki heyətin 95 faizi dəyişəcək. Hansı futbolçunun adını yoxlayırıq, onun nə vaxtsa peşəkar liqada çıxış etdiyi bəlli olur. Onların əvəzedici heyətdə oynaması belə bizə problem yaradır. Adı bir dəfə iştirak ərizəsində qeyd olunanları da sifariş verə bilmirik. Bu səbəbdən də heyət 95 faiz dəyişəcək. Təəssüf ki, transfer etmək istədiyimiz oyunçuların da adları peşəkarlar siyahısından çıxır. 8-9 futbolçu nəzərimizdə idi ki, UEFA Region Kuboku üçün heyətə cəlb edək. Onların da 5-6-nın peşəkar olduğu üzə çıxdı. Bu səbəbdən də qərar verdik ki, bütün heyət dəyişsin. Buna məcburuq. İstəməzdik ki, belə olsun. Çünki həmin futbolçular bizi çempion ediblər. Onlarla yaxşı komanda formalaşdırmışdıq. Heyəti daha da gücləndirmək istəyirdik. Amma belə maneələrin olması bizə problem yaratdı. Sonda qərar verdik ki, “Cəbrayıl” olaraq Azərbaycanı təmsil edirik. Məqsədimiz UEFA Region Kubokunda ölkəmizin adına layiq mübarizə aparmaqdı. Bu səbəbdən də karyerası ərzində heç bir peşəkar liqada iştirak etməyən futbolçulardan ibarət komanda formalaşdırırıq”.
İLKİN SULTANLI
Digər xəbərlər
