“AFFA-nın qərarı mənim üçün gözlənilməz olmadı” - Cavid Hüseynov
Dünən AFFA İcraiyyə Komitəsinin verdiyi qərara əsasən Region Liqasında çıxış edən üç klub - “İmişli”, “Araz Naxçıvan” və “Mingəçevir” gələn mövsümdən 1-ci divizion iştirakçılarına qoşulacaq. Maraqlı məqam budu ki, turnir hələ davam edir. Çempion bəlli deyil. Lakin federasiya artıq belə qərar verib.
Bəlkə də Region Liqasının ən təşkilatlanmış və güclü komandası “Cəbrayıl”dı. Cavid Hüseynovun həm prezidenti, həm də baş məşqçisi olduğu bölgə təmsilçisinin 1-ci diviziondan kənarda qalması, yəqin ki, əsasnamədə yer alan 3 il şərti ilə bağlıdı. Görəsən, gənc mütəxəssisin federasiyanın bu qərarına münasibəti necədi? Cavid Hüseynov sualımızı belə cavabladı:“Biz bu məsələ ilə bağlı açıqlama vermək istəyirdik. Sizin vasitəsinizlə ictimaiyyətə məlumat versək, daha yaxşı olar. Dünən AFFA maraqlı qərarlar qəbul etdi. Mənim üçün gözlənilməz olmadı. Düşünürdüm ki, adımız burda olmaya bilər. Buna baxmayaraq, məqsədyönlü şəkildə işimizi davam etdiririk. Futbolçularımızın inkişafı üçün əlimizdən nə gəlirsə, edəcəyik. Hansı ki, komandada olanların çoxu gələcək vəd edirlər. Bu gün yarımfinala vəsiqə qazanmışıq. Amma bizim heyətin 5-6 üzvü 2002-03 təvəllüdlü uşaqlardı. Mən bu gənclərlə bir yol qət etmişəm. Bizim strategiyamız bu idi. Divizionun reqlamentində bu qərar var idi. Buna hazır idik. Sadəcə, mən həmişə deyirdim: işimizi elə qurmalıyıq ki, hər şeyə hazır olaq. Ola bilsin, sabah qərar verildi ki, “Cəbrayıl” 1-ci divizonda çıxış etməlidi. Belə olanda bizi dərd götürməsin. Belə şəraitə hazır olmalıyıq. Amma dünən qərar verilib ki, başqaları diviziona yüksəlsin. Bu, faciə-filan deyil. Bizim üçün əsas məqsəd komandanın formalaşmasıdı. Ancaq inkişaf haqda düşünməliyik. Bir qərar verilib, buna hörmət edirik. Ola bilər ki, qarşıdakı illərdə nəsə dəyişməsə, o zaman gələn il də 1-ci divizionda iştirak edə bilməyəcəyik. Buna baxmayaraq, yenə Region Liqasında çıxış edəcəyik. Bunu azarkeşlərimiz də bilsin və hazır olsun. Yeni yaranan klubuq. Hər il daha da inkişaf etməliyik. Buna borcluyuq. Klub kimi daha yaxşı formalaşmalıyıq. Region Liqası başa çatmamış qərarın açıqlanması hardasa futbolçuların motivasiyasını aşağı saldı. Amma mən onlarla iclas keçirəcəm. Bu qərar bizə mane olmamalıdı. Futbolçu öz oyununu oynamalıdı. Klubun strategiyası oyunçunun marağında ola bilər, amma bizim məqsədimiz başqadı. Finala vəsiqə qazanmaq istəyirik. Bundan başqa, əsas hədəfimiz çempion olmaqdı. Başqalarını bilmirəm, amma bizə bu qərar, sadəcə, motivasiya düşüklüyü yaşatdı”.
İLKİN SULTANLI
Digər xəbərlər
