Region Liqasında uzun marafon başa çatdı.

8 ay davam edən turnirdə “Cəbrayıl” çempion oldu. Cavid Hüseynovun komandası Şamaxıda keçirilən finalda “Xan Lənkəran”ı məğlub etdi - 1:0. Turnirin finalı özünəməxsus alındı. Həm “Cəbrayıl”, həm də “Xan Lənkəran” azarkeşləri komandalarına möhtəşəm dəstək verdilər. Həvəskar səviyyəli turnir olsa da, final statusuna layiq oyun izlədik. Təbii ki, bunun əsas səbəbkarı Region Liqasının təşkilatçıları idi. Görüşü AFFA-nın yüksək vəzifələrinin izləməsi və qarşılaşmadan sonra hansısa gərginliyin yaşanmaması çox şeydən xəbər verirdi. Bu işlərə nəzarət etmək o qədər də asan deyil. Lakin AFFA-nın Uşaq və Gənclər üzrə Yarışların Təşkili Şöbəsinin müdiri Yusif Vəliyev və komandası bu işin öhdəsində gələ bildi. Şamaxıdakı final görüşündən sonra qurum rəhbəri ilə Region Liqasının son mövsümü haqda söhbətləşdik.

- Möhtəşəm qarşılaşmada “Cəbrayıl” “Xan Lənkəran”ı məğlub edərək çempion oldu. Oyun haqda nə deyə bilərsiz?
- Bizim üçün önəmli olan oyunun təşkilatçılığı idi. Şükür, hansısa ciddi problemlə qarşılaşmadıq. Maksimum çalışdıq ki, hər şey ideal səviyyədə olsun. Təbii ki, azarkeşlər də oyuna əlavə gözəllik qatdı. Bununla da 8 ay davam edən Region Liqası bu gün başa çatdı. “Cəbrayıl”ı çempionluq münasibəti ilə ürəkdən təbrik edirəm.

- Həm liqanın rəhbəri, həm də təşkilatçısı kimi 8 ayı ümumilikdə necə dəyərləndirirsiz?
- Təbii ki, Region Liqası başlayarkən AFFA rəhbərliyinin qarşıya qoyduğu məqsədlər var idi. Bildiyiniz kimi, iştirakçıların da hər birinə tərəfimizdən müvafiq dəstək göstərilib. Liqa həvəskar statusda olsa da, təşkilatçılığı peşəkar səviyyədə etmək istəyirdik. Bizim üçün əsas məqsəd bu idi. Təbii ki, problemlər də, hansısa çatışmazlıqlar da oldu. Çünki çempionatın statusu peşəkar deyil. Ona görə bəzi məsələlərə həvəskar səviyyədə yanaşılır. Amma nəticə olaraq baxsaq, təşkilatçı kimi maksimum çalışdıq ki, hər şey yüksək səviyyədə olsun.

- Növbəti mövsüm üçün çempionatda regionların sayının artırılması və ya reqlamentdə hansısa dəyişiklik gözlənilir?
- Təbii ki, artıq növbəti həftələrdə gələn mövsümün planı hazırlanacaq. Həm də reqlamentə baxılacaq. Ola bilər ki, hansısa dəyişiklik olsun. Lakin turnirin keçirilməsi iştirakçı komandaların sayından və zonalardan asılı olacaq. Buna uyğun hansısa dəyişikliklər ola bilər. Əks halda sistemdə dəyişiklik etmək planda yoxdu.

- Ramin Musayev “Şamaxı” - “Neftçi” matından sonra verdiyi müsahibədə demişdi ki, tezliklə Qarabağ bölgəsinin komandalarının yaradılması gözlənilir. Buna uyğun Qarabağ regionu yaradıla bilərmi? Onların həvəskar liqada iştirakına şərait yaradıb, peşəkarlaşması istiqamətində kömək göstərmək olar?
- Planda var ki, bütün zonalar, eyni zamanda Qarabağ üzrə komandalar cəlb olunsun. Amma bu işlər bizdən asılı deyil. Hazırda Qarabağda təmir-tikinti işləri gedir. Buna uyğun nələrəsə qərar veriləcək. İndi isə bu məsələ ilə bağlı bir söz deyə bilmərik.

- Final gözlədiyiniz kimi alındı? “Cəbrayıl”ın çempionluğunda şans amili rol oynadı, yoxsa əvvəlcədən bu komandanın qalib gələcəyi hiss olunurdu?
- Təkcə “Cəbrayıl”ı qeyd etmək istəməzdim. Təşkilatçı olaraq, heç bir komandaya qarşı simpatiya göstərmirik. Bütün klublara eyni yanaşırıq. Amma “4-lər finalı”nda iştirak edək bütün komandalarda peşəkar yanaşma var idi. Buna görə də, təbii ki, komanda daxilində sistemin, peşəkarlığın olması istər-istəməz nəticədə özünü göstərir. Başqa məsələləri - oyun baxımından kimin üstün olması və ya şans amilini peşəkar mütəxəssislər daha yaxşı dəyərləndirə bilər.

- Region Liqasından 3 klub 1-ci divizionda iştirak hüququ qazandı. Bu məsələ sizi sevindirir? Onların 1-ci divizionda iştirakı sizə əlavə motivasiya verirmi?
- Region Liqası 2018-ci ildə İcraiyyə Komitəsinin qərarı ilə yaradıldı. Əvvəlləcədən bildirildi ki, 1-ci divizionda çıxış etmək istəyən komanda 3 il bu çempionatda oynamalıdı. Bu il həmin müddət başa çatdı. Sevinirəm ki, üç ilin tamamında elə üç komanda peşəkar liqaya - 1-ci diviziona yüksəldi.

İLKİN SULTANLI