Mayami “Qran-pri”sində Maks Ferstappen finişə birinci çatdı.

Mövsümdə 3-cü qələbəsini qazanan “Red Bull”un niderlandlı pilotu şəxsi hesabda Şarl Leklerdən geriliyi 19 xala endirdi.

- Yarış vaxtı Serxio Peresin maşınında güc qurğuları ilə bağlı texniki problem yarandı. Sizdə bolidin etibarlılığı şübhə doğurmadı?
- Xoşbəxtlikdən yarışın gedişində maşınımda texniki problem yaranmadı. Bu baxımdan yarış rahat keçdi – pozitiv məqamdı. Düşünürəm ki, mən bütün bəxtsizlik limitini cümə günü xərcləmişdim. Yalnız restartdan sonra təkərlərin qızması ilə bağlı kiçik problem oldu. Yürüşün gedişində bir neçə səhvə yol verdim, ancaq şikanadan və 16-cı döngədən düz yola doğru çıxmaq hər şeydən vacib idi. Maşınımızın maksimal sürət üstünlüyünün olması da mənə kömək etdi.

- Yarış həftəsonunda bir neçə dəfə gileyləndiz ki, maşında nəsə qaydasında deyil, problemi yoluna qoymaq lazımdı. Yürüş vaxtı işlər düzəldi?
- Bunu deyərkən onu nəzərdə tuturdum ki, cümə günü çoxlu problem yaşadım və bunlar təsnifat mərhələsində mövqeyimə təsir etdi. Yürüşdə hər şey rahat oldu, ancaq praktiki cəhətdən cümə gününü boşa verdiyimi nəzərə alsaq, hər şey fərqli də ola bilərdi. Həftəsonun müsbət axarda keçirmək bizim üçün vacibdi. İmola mərhələsində belə olmuşdu. Yüksək etibarlılıq təmin olunmalıdı. Bununla yanaşı, bizdə olan sürət də vacibdi ki, bu məqam məni sevindirir. Maşın etibarlı, ancaq ləng olsaydı, nə faydası olacaqdı?!

- Maks, şəxsi hesabda başqalarını təqib etmək xoşuna gəlir, yoxsa başqalarının səni təqib etməsi?
- İndiki mövqeyim məni qane edir. Məsələn, ötən ilin sonunda mənə çatırdılar və bundan məmnun deyildim. Çünki maşınımda sürət çatışmazlığının olduğunu bilirdim. Mövsümün sonluğunun çətin alınacağını anlayırdım. Sizin bu sualınızın cavabı maşının nə dərəcədə rəqabətədavamlı olmasından asılıdı.

- Mayami mərhələsində trassın örtüyü ilə bağlı çoxlu söz-söhbət oldu. Güman edirsiz ki, gələnilki mərhələ ərəfəsində təşkilatçılar asfalt örtüyünü tam dəyişməlidi?
- Düzü, vəziyyət gözlədiyimdən pis oldu. Yeni trassda dərhal yaxşı asfaltın salınmasına dair də nümunələr var. Məsələn, Səudiyyə Ərəbistanında belə oldu. Orda asfalt örtüyü hər cür manevrə imkan verir. Konfiqurasiya ilə bağlı da nəsə düşünmək olar, xüsusən də ikinci sektorla bağlı. Trassı daha maraqlı etmək mümkündü.

ORXAN hazırdadı