“Turan Tovuz” 32 il sonra avrokuboklara qayıda bilər. Əslində Qərb təmsilçisi ötən mövsüm də buna yaxın idi. Kurban Berdıyevin komandası mövsümü 4-cü yerdə bitirdi. Amma kubokun finalında “Qarabağ” sensasiyalı şəkildə “Sabah”a uduzmaqla tovuzluların avrokubok arzusunu ürəyində qoydu.

Komanda bu mövsüm praqmatik futbolla bunu bacara bilər. Möcüzə baş verməsə, tovuzlular mövsümü 3-cü pillədə başa vuracaq. Düzdü, uğurun memarı baş məşqçi sayılır. Deyə bilərsiz ki, Ayxan Abbasova da şans verildi, o nə etdi? Ayxan Abbasova Berdıyevə verilən imkan verildimi? Söhbət zamandan yox, maliyyədən gedir.

Ayxan bəyin klubun idarə heyətinin sədri Ehtiram Quliyevlə son görüşündə, bilirsiz, nə olmuşdu? İclasda idarə heyətinin üzvləri, Ayxan Abbasov və Ehtiram Quliyev var idi. Növbəti mövsümün planları danışılırdı. Ehtiram bəy digər iştirakçılardan Ayxan Abbasovla onu tək qoymalarını xahiş edib. Yarım saat sonra otaqdan çıxıblar, bəlli olub ki, Abbasov komandadan gedir. Ehtiram Quliyev avrokuboklar istəyib, amma büdcə limiti ilə. Yəni Berdıyevə verilən qədər yox. Söhbət maaşdan yox, futbolçuların gətirilməsindən gedir.

Xülasə bu uğuru Ayxan Abbasov da bacarardı. Amma iş elə gətirdi ki, Quliyev həmvətəninə yox, əcnəbiyə güvəndi. Abbasovun yaxınlarından eşitdiyimizə görə, o belə futbolçuların gətirilməsinə icazə veriləcəyi təqdirə qalıb işləyəcəyini deyib.
Kurban Berdıyev uğur qazandı, sağ olsun. Amma belə sıxıcı futbol Tovuz camaatını həmişə qane etməyəcək. Azarkeşlər rəngarəng, baxımlı oyun arzulayır. Kurban Berdıyev isə heç vaxt bunu bacarmayıb. Rusiya futbolunda azarkeşlərin ondan əsas narazılığı müdafiə futbolunu bu ölkəyə gətirib, çempionata marağı aşağı salmasıyla bağlı idi.

Nəticə daha vacibdi, “ok”. Amma bu həmişə olmayacaq. Necə ki, ötən mövsüm olmadı. Çox güman, “Turan Tovuz” avrokuboklara gedəcək. Bu uğur üçün təşəkkürlər, Berdıyev! Gedə bilərsən...

MÜZƏFFƏR QULUZADƏ