“Qobustan”ın “Xan Lənkəran”ın hüquqi varisi olması AFFA-dan asılıdı - AÇIQLAMA
“Mən 3 il oynamışam, gəl yerimi sənə verim” deməklə heç nə alınmır”
AFFA İcraiyyə Komitəsinin qərarına əsasən "Xan Lənkəran" birinci diviziona buraxılmadı.
Bundan sonra Lənkəran təmsilçisinin rəhbərliyi Prezident İlham Əliyevə müraciət etdi. Məktubda klubun 1-ci divizionda iştirakının təmin olunması xahiş edilib və bunun əsasları göstərilib. Region Liqasının digər iştirakçısı "Qobustan" isə Lənkəran klubuna maraqlı jest edib. Qobustan təmsilçisi 3 il Region Liqasında iştirakın vacibliyi ilə bağlı şərtə görə birinci diviziona vəsiqə qazana bilməyən "Xan Lənkəran"a varislik verməyi təklif edib. Hazırda bu yöndə danışıqlar gedir.
Görəsən, bu təklifin əsası varmı? İdman hüququnda varislik necə tənzimlənir? Məsələ ilə bağlı qaranlıq məqamlar çoxdu. Buna aydınlıq gətirməsi üçün vəkil Fərid Haqverdiyevə müraciət etdik. Tanınmış hüquqşünası dinləyək:
“Burda iki istiqamət var: hüquqi və futbol tərəfi. Birincidən başlayaq. Əvvəlcə bilməliyik ki, “Qobustan” Məhdud Məsuliyyətli Cəmiyyətdi, yoxsa İctimai Birlik? Əvvəlcə onun təşkilati formasını bilməliyik. Deyək ki, MMC-di. Belədə “Xan Lənkəran”ın təşkilati forması da eyni olmalıdı. Bu zaman “Qobustan” MMC qoşulmalıdı “Xan Lənkəran” MMC-yə. Və ya “Qobustan” MMC ləğv olunub, qoşulmalıdı “Xan Lənkəran” MMC-yə. İstənilən halda hüquqi proses getməlidi. Bunun 4 yolu var: çevrilmə, ayrılma, birləşmə, birləşib yeni hüquqi şəxs olma. İkinci, yəni futbol tərəfi də hüquqidən asılıdı. Bu baş verəndən sonra müraciət olunur AFFA-ya. Assosiasiya varislik məsələsini tanımalıdı. Necə ki, “Keşlə” “Şamaxı” olanda UEFA-ya müraciət olundu. Həmin vaxt da Avropanın ali futbol qurumu bunu qəbul etdi. Eynilə burda da bu proses getməlidi. AFFA qəbul etsə, burda heç bir problem qalmır. Burda hansısa maneələr ola bilər. Məsələn, futbolçuların öhdəlikləri yerinə yetirilməlidi, icarəyə götürülən yerlərin borcları ödənilməlidi. Yəni hər xırda detal həllini tapmalıdı. Lakin əsas məsələ AFFA-nın bu varisliyi tanımasıdı. Bunun üçün isə hüquqi proseduru həyata keçirmək lazımdı. Yoxsa hansısa Region Liqası klubu deyə bilməz ki, “bu gündən “Xan Lənkəran” mənim hüquqi varisimdi”. Uzun sözün qısası, ya alğı-satqı olmalıdı, ya da hüquqi proseslər baş verməlidi. Yoxsa “mən 3 il oynamışam, gəl yerimi sənə verim” deməklə heç nə alınmır”.
İLKİN SULTANLI
Digər xəbərlər
