“Xan Lənkəran”ın 1-ci diviziona buraxılmaması ölkə futbolunda gündəm yaratdı.

Cənub təmsilçisi müxtəlif yollara əl ataraq məsələni öz xeyirinə həll etməyə çalışır. Klubun qarşısında konkret 3 il Region Liqasında çıxış etmək öhdəliyi qoyulub. “Xan Lənkəran” bu problemin həlli üçün hətta ölkə başçısına da müraciət edib.

Kluba bu məsələdə kömək etmək istəyənlər var. Ötən günlərdə “Qobustan” varisliyini adı çəkilən kluba təklif edib. Görəsən, bu məsələnin həlli üçün hansı işlər görülür? Klublar hüquqi prosesi həll edib? Bu və digər suallara cavab tapmaq məqsədilə “Qobustan”ın vitse-prezidenti Taleh Gülməmmədovla əlaqə saxladıq.

- “Qobustan” 1-ci divizionda çıxış etməsi üçün “Xan Lənkəran”a varislik təklif edib. Bununla bağlı hansı hüquqi addımlar atılıb?

- Ədliyyə Nazirliyinə, “ASAN Xidmət”ə müraciət olunub. Bütün lazımi işlər həyata keçəcək. Məqsədimiz “Xan Lənkəran”ı 1-ci divizionda, premyer-liqada görməkdi. İstəyirik ki, komanda adı çəkilən çempionatlarda iştirak etsin. Bunun üçün də əlimizdən nə gəlirsə, edirik. Bu klub kənarda qalmamalıdı. Çünki buna layiqdi. İndi hüquqi məsələlər həll olunur. Çox güman, bir-iki günə təsdiqlənəcək. Bundan sonra başqa məsələlərə aydınlıq gələcək.

- “Qobustan” bütövlükdə satılır “Xan Lənkəran”a, birləşmək haqda düşünürsüz?
- Bu haqda hələ tam qərar verilməyib. “Xan Lənkəran” üçün nə məqsədəuyğundusa, onu da edəcəyik. Məqsədimiz adı çəkilən klubun irəli getməsidi. Ola bilər ki, “Qobustan”la bağlı bütün səlahiyyətlər onlara verilsin. AFFA-nın “Xan Lənkəran”dan tələbini biləndən sonra cənub təmsilçisinə belə bir təklif etdik. Çünki istəyirik ki, Azərbaycanda belə klub olsun. “Xan Lənkəran”ın diviziona yüksəlməsi ölkə futbolunun inkişafıdı.

- Klub “Xan Lənkəran”la birləşsə, böyük ehtimalla Region Liqasında iştirak edə bilməyəcəksiz...

- Çox güman, tezliklə AFFA-nın hüquq şöbəsi ilə görüşümüz olacaq. Varislik məsələsinin həllini gözləyirik. Bu baş versə, istəyirik ki, Qobustanda başqa adla yeni komanda yaradaq. Bu bölgəni futbolsuz qoya bilmərik. Bizdə cüzi də olsa, inkişaf var. Dediklərimin hamısı baş tutsa, Qobustanda yeni klub yaratmaq niyyətindəyəm. Şəxsən özüm belə bir addım atacam.

- “Xan Lənkəran”ın rəhbərliyi sizin üçün stadion tikirdi. Bu məsələnin sonu necə oldu?

- Doğru buyurursuz. “Xan Lənkəran” rəhbərliyi, şəxsən Pərviz Hüseynov bizim üçün stadion tikdirir. Buna görə ona xüsusi təşəkkürümüzü bildiririk. Yaxın zamanda bizim qəsəbədə möhtəşəm bir stadion istifadəyə veriləcək. Allah razı olsun ki, Pərviz bəy belə bir iş görür. İşlər davam edir. Əvvəlcə stadionun ərazisi təmizləndi. Burda xüsusi texnika işlədi. İndi bərkitmə işləri görülür. Stadionun tutumu haqda məlumatım yoxdu. Yaxın günlərdə Pərviz bəylə görüşümüz baş tutacaq. İnşallah, möhtəşəm bir layihə olacaq.

- “Xan Lənkəran” rəhbərliyi ölkə başçısına müraciət edib. Varislik məsələsi alınmasa, siz də bu çağırışa qoşulacaqsız?

- Biz istəyirik ki, Cənub bölgəsində böyük futbol olsun. Burda klubun olması ölkə futboluna rəng qatır. Vallah, əlimizdən nə gəlirsə, etməyə hazırıq. Hara müraciət etmək lazımdısa, buna qol qoya bilərik.

İLKİN SULTANLI