Millət vəkilinin oğlunun məşqçisi narazıdı - AÇIQLAMA
Dünən saytımızda millət vəkili Tahir Kərimlinin oğlu Zahidağa Kərimlinin Gürcüstanın 2-ci liqasında çıxış edən “Borjomi” ilə birillik müqavilə bağlandığını xəbər vermişdik.
Onu da bildirmişdik ki, 23 yaşlı futbolçunun böyük futbola gəlişində onunla fərdi şəkildə məşğul olan Zamin Əsədullayevin rolu olub.
Görəsən, mütəxəssis millət vəkilinin oğlu ilə fərdi çalışmağa necə razılıq verib, tanışlıq hardan yaranıb? Bu suala cavab tapmaq üçün Əsədullayevlə danışmağa qərar verdik. Fərdi hazırlıq mərkəzinə rəhbərlik edən A kateqoriyalı mütəxəssis “Football-plus.az” saytına bunları söylədi:
“Zahidağa öncə mənə “instaqram” vasitəsi ilə müraciət etdi. Futbolçu olmaq istədiyini, özündə bu potensialı gördüyünü söylədi. Yaşı ilə əlaqədar ona şans verilmədiyini, özünü göstərmək, gələcəkdə böyük futbol oynamaq istədiyini dedi. Hər bir gəncə şans vermək lazımdı. Fikrimcə, gəncə baxmadan, nəyə qadir olduğunu bilmədən, yaşını bəhanə edərək onu siyahıdan silmək, üstündən xətt çəkmək düzgün deyil. Bizim əksər məşqçilər böyük futbola can atan 17-18 yaşda gəncə “artıq gecdi” deyib yolundan döndərirlər. Məncə, bu yanlış addımdı. Müraciətini nəzərə alıb onunla görüşdüm. Bədən quruluşuna baxanda gördüm ki, idmançı görkəminə malikdi. Boyu, fiziki göstəriciləri futbola uyğun gəlir. İkinci mərhələ artıq meydanda oldu. İlk məşqlərdən görünürdü ki, Zahidağa futbol oynaya bilər. Onu da bildirim ki, Kərimli standart oyunçu deyil. Nə mənada? Riski sevir, topla hücumu kəskinləşdirməyi bacarır. Qarşısındakını çox rahat keçə bilir. Driblinqi yüksək səviyyədədi, qəfil istiqamət dəyişməyi bacarır. Başqa müsbət keyfiyyətləri də var ki, onları indi bir-bir sadalamaq istəmirəm. Onunla çalışmağa başladıq. İki aydan sonra hərbi xidmətə yollandı. Təsəvvür edin, onda nə qədər böyük həvəs var idisə, əsgərlikdə olduğu müddətdə də məndən proqram istəyirdi ki, fürsət olanda məşq etsin. Bir ildə ona 120 məşq proqramı göndərdim. Və Zahidağa hərbi xidmətdə ola-ola məşqləri davam etdirdi. Mən ona koordinasiya pilləkəni, konus və başqa ləvazımatlar göndərmişdim. Səhv etmirəmsə, ötən ilin oktyabrında hərbi xidməti başa vurub geri döndü. Gələn kimi yanıma qayıtdı. Düzdü, çox arıqlamışdı - əsgırlikdən gələn adamın belə olması adi haldı – ancaq hiss olunurdu ki, məşqsiz qalmayıb. Onunla bir müddət birgə çalışdıq və çatışmayan cəhətlərini aradan qaldırdıq. Bir müddət sonra videosunu Gürcüstan klubuna göndərdik. Qarşı tərəf baxıb bəyənəndən sonra müqavilə bağlamaq üçün Tiflisə dəvət etdi”.
RƏŞAD
Qeyd: Zamin Əsədullayevin geniş müsahibəsini “Futbol+”in növbəti sayında oxuya bilərsiz.
Digər xəbərlər
