Portuqaliyaya qarşı oyunda qaçırdığı vacib penalti ilə yaddaşlarda iz buraxan və dramatik şəkildə yığma karyerasını bitirən Burak Yılmazın bu mövsüm klub karyerası da istənilən səviyyədə keçmir.

Fransa çempionatının 29-cu turunda ''Lill'' aşkar autsayder ''Bordo''nu qəbul etdi. Burak Yılmaz və Türkiyə yığmasının digər üzvü Zəki Çəlik 90 dəqiqə meydanda oldular. ''Bordo''nun 35-ci dəqiqədən azlıqda oynamasına baxmayaraq görüş qolsuz başa çatdı. ''Lill''in heyətində Burak və Lihaci ən az xal qazanan futbolçular oldu. ''Ekip'' onların hər ikisinin oyununu 3 xalla qiymətləndirdi. Aylardı qol vura bilməyən təcrübəli forvardın həm fanatlar tərəfindən fitə basılması, həm də mətbuatın tənqidi ilə üzləşməsi adi hala çevrilib.

36 yaşlı futbolçu Liqa-1-də son qolunu dekabrın 22-də ''Bordo'' ilə səfər oyununda vurub. Bundan başqa ''Ekip'' nəşrinin paylaşdığı bir xəbər diqqət çəkib. Burak bu mövsüm çempionatda 34 dəfə ofsayda düşüb. Ondan çox ''böyuk beşlik''də ofsayda düşən futbolçu yoxdu! Yayda türkiyəli ulduzun Fransanı tərk edərək ya vətəninə qayıdacağı, ya da ABŞ-a yollanıb karyerasını orda bitirəcəyi gözlənilir. Onun klubu ilə müqavilə müddəti yayda başa çatır. Burakın bu mövsüm ''Lill''də 26 çempionat oyununda cəmi 4 qol vurduğunu bildirək.