Dzyuba yığmadan niyə imtina edib?
Artyom Dzyuba bir xahişi və ya imtinası ilə Rusiya idman ictimaiyyətində özünə qarşı mənfi fikir formalaşdırıb.
“Zenit”in hücumçusu milli komandanın bu aya təyin olunan toplanışında iştirakdan imtina edib.
Yığmanı çalışdıran Valeri Karpin Rusiya Futbol İttifaqının saytına açıqlamasında belə deyib:
“Bazar günü Dzyuba ilə telefonla danışdıq. O mənə yığmada çıxış etməyi çox istədiyini dedi. Amma indiki vəziyyətdə buna hazır olmadığını bildirdi. Ukraynada onun qohumları yaşayır. Oradakı vəziyyət isə ağırdı. Artyom üzr istəyərək ailə məsələlərinə görə bu dəfə yığmanın təlim-məşq toplanışına çağırılmamasını istədi. Biz razılaşdıq ki, onun “Zenit”dəki çıxışını izləməyə davam edəcəyik”.
33 yaşlı futbolçu isə “Sport-Ekspress” qəzetinə açıqlamasında Karpinin onu düzgün başa düşmədiyini və ya baş məşqçinin fikrinin yanlış təfsir olunduğunu bildirib:
“Yığmaya bu dəfə qoşulmaq istəməməyim heç də siyasi səbəblə bağlı deyil. Məsələ ailəmlə bağlıdı, amma mən buna geniş toxunmaq istəmirəm. İndiki vaxtda ailəmlə birgə olmaq istərdim. Mənə elə gəlir ki, anlaşılmazlıq olub: ya Valeri Georgiyeviç məni düzgün başa düşməyib, ya da baş məşqçinin fikri yanlış izah olunub”.
