Karpin Dzyubanın Rusiya millisində oynamaq istəməməsini belə şərh etdi
Artyom Dzyuba Rusiya idman ictimaiyyətini təəccübləndirib.
“Zenit”in hücumçusu milli komandanın bu aya təyin olunan toplanışında iştirakdan imtina edib. Baş məşqçi Valeri Karpin Rusiya Futbol İttifaqının saytına açıqlamasında belə deyib:“Bazar günü Dzyuba ilə telefonla danışdıq. O, mənə yığmada çıxış etməyi çox istədiyini dedi. Amma indiki vəziyyətdə buna hazır olmadığını bildirdi. Ukraynada onun qohumları yaşayır. Oradakı vəziyyət isə ağırdı. Artyom üzr istəyərək ailə məsələlərinə görə bu dəfə yığmanın təlim-məşq toplanışına çağırılmamasını istədi. Biz razılaşdıq ki, onun “Zenit”dəki oyunlarını izləməyə davam edəcəyik”.
Dzyuba Rusiya yığmasında 2011-ci ildən çıxış edir. 33 yaşlı hücumçu indiyədək milli formada 55 oyun keçirib və 30 qol vurub.
