Azərbaycan klublarına Rusiya və Ukraynada oynayan futbolçular təklif olunub - AÇIQLAMA
Rusiya - Ukrayna müharibəsinin 14-cü günü geridə qaldı.
Aradan keçən iki həftə hər iki ölkə üçün həyatın bütün sahələrində olduğu kimi, futbolda da dərin iz qoydu. Təcavüzə məruz qalan Ukraynada qış fasiləsindən sonra keçirilməli olan matçlar qeyri-müəyyən müddətə təxirə salındı. UEFA və FİFA bu prosesi tənzimləmək üçün müəyyən proseslərdən istifadə etməyə çalışır. Bunlardan biri də iki ölkənin klublarında çıxış edən legionerlər üçün xüsusi “transfer pəncərəsi”nin açılmasıdı. Qərarın yaxın günlərdə rəsmiləşəcəyi istisna olunmur. Belə vəziyyətdə, təbii ki, bizi maraqlandıran həmin oyunçuların klublarımıza gəlmək ehtimalıdı. Görəsən, futbol menecerləri bu sahədə hansısa işlər görürlər? Yaranan vəziyyəti dəyərləndirmək istəyən klublarımız var? Bunu öyrənmək üçün ölkənin aparıcı menecerləri ilə danışdıq.
Tural Əsgərov: “FİFA-nın qərarırna əsasən Ukrayna klublarında çıxış edən legionerlərin müqavilələri yaya kimi dondurulur. Bu da o deməkdi ki, həmin futbolçular başqa anlaşmaları olmasa, sadəcə, yaya kimi icarə əsasında başqa kluba keçə bilərlər. Rusiya isə aydın məsələdi. Bizim üçün də əslində əlçatan elə qonşu ölkədə oynayan legionerlərdi. Onları da 2, uzağı 3 aylıq götürmək klublara da fayda verməyəcək. Yəni inanmıram ki, “Zirə” ikiaylıq futbolçu götürsün ki, nədi-nədi, biz “Neftçi”ni qabaqlayıb ikinci yeri tutaq. Eyni fikir “Neftçi”yə, “Qəbələ”yə də aiddi. Rusiyada ancaq autsayderlər sırasında qərarlaşan klubların legionerlərinin Azərbaycana gəlmək ehtimalı varsa belə, bu ancaq “Qarabağ” ola bilər. Onların bu il elə bir istəyi yoxdu. Ancaq yayda hansısa mövqeləri möhkəmləndirmək bardə düşünə bilərlər. Bunları da hələ dəqiqləşdirməyiblər. Rusiyanın autasayder klublarında oynayan futbolçuların “Qarabağ”ı nə dərəcədə gücləndirmək potensialına malik olacaqlarını demək çətindi. Hesab etmirəm ki, bu vəziyyət klublarımız üçün göydəndüşmədi. Açığı, çox az ehtimaldı ki, bu iki ölkədən Azərbaycana transferlər olsun”.
Vaqif Heydərli:
“Belə müraciətlər var. Rusiyadan çox azdı. Amma əsasən Ukraynadan təklif olunan futbolçular var. Bir-iki oyunçunu klublarımıza təklif etmişik. Hələ ki real bir şey yoxdu. Azərbaycanla yanaşı, digər ölkələrə də təklif etdiyimiz futbolçular var. Proseslərin irəlilələməsinə uyğun addım atacağıq. Öz klublarımıza məsləhət gördüyümüz oyunçular, adətən, çempionatlarında orta və daha aşağı pillələrdə qərarlaşan klublarda çıxış edənlərdi. Lakin digər ölkələrə təklif etdiklərimiz ön sıralarda gedən klublarda oynayanlardı”.
Erkin İbrahimov :
“Premyer-liqada 8 klub var. Bu gün onlardan ikisinə transfer lazım olar, ya olmaz. O da yay üçün. İndi bu ölkələrdə futbolçuları iyuna kimi icarə şərti ilə buraxırlar. Çempinatda hazırda Avropaya gedəcək 4 klub da, heç bir məqsədi olmayan qalan dördü də bəllidi. Ötənilki kimi çempionluq uğrunda gərgin mübarizə getsəydi, onda bu məsələyə maraq daha böyük olardı. Açığı, o qədər axtarmıram. Özləri əlaqəyə çıxırlar. Ukraynada da, Rusiyada da legioner olan futbolçuların menecerləri, çıxış etdikləri klubların idman direktorları əlaqə yaradırlar. Bunlardan bir neçəsi ilə bağlı Azərbacanda bir-iki klubla danışmışam. Bəlkə də alınar. Lakin indi real bir variant yoxdu”.
Səbuhi Səfiyarlı:
“Bu məsələ ilə bağlı dostlarımızla söhbətimiz olub. Mövzunu real görmədiyimdən ciddi maraqlanmadım. Əslində mənim Ukrayna çempionatında oynayan brazilyalılar və digər ölkələrədən olan legionerlər ilə danışığım olub. Lakin biz yay üçün danışmışıq. Müqavilələri başa çatdıqdan sonra bir iş görməyi planlaşdırırdıq. Amma bu hadisə baş verdi deyə, onların əksəriyyəti ölkələrinə gediblər. Həm də klublarımız artıq transfer büdcəsini bağlayıb, heyətlər tam komplektləşib. Demək olar ki, hazırda çempionatda yeni futbolçuya ehtiyacı olan klub yoxdu. Çünki qarşısına böyük məqsəd qoymayanlar transfer üçün büdcədən pul ayırmırlar. Böyük hədəfləri olan klublarımızın isə artıq futbolçuya ehtiyacı yoxdu. Digər tərəfdən, bu oyunçular dekabrda fasilə yaranandan bəri futboldan uzaqdılar, 3 aydı oynamırlar. Onların gəlib formaya düşməsi üçün də vaxt lazım olacaq. Buna görə də klublarımızın bu iki ölkədən kimisə transfer etməsini hazırda real görmürəm”.
SƏNƏM FƏRHADOVA
