“Qarabağ” dünən 21 yaşlı ulduzu Nəriman Axundzadənin ABŞ-nin “Kolambus Kryu” klubuna transfer edildiyini açıqladı.

“Football-plus.az” “Kolambus Kryu” ilə bağlı maraqlı məqamları xatırladır.

1994-cü ilin iyununda yaranan klub Ohayo ştatının əsas şəhəri olan Kolambusu təmsil edir. “Kolambus Kryu” MLS-in ən çox çempion olan 3-cü komandasıdı, yalnız “Los-Anceles Qalaksi” ilə “DC Yunayted”dən geri qalır. Son çempionluq isə elə də uzaq keçmişdə deyil. 2008, 2020 və 2023-cü illərdə komanda çempionluq yaşayıb.

“Kolambus Kryu”nun 50 milyon avro “transfermarkt” dəyəri var. Əsasən gənc futbolçulardan qurulan komandanın yaş ortalaması 26-dı. Komandanın ən dəyərli futbolçusu Dieqo Rossidi. Uruqvay yığmasının da formasını geymiş 27 yaşlı yarımmüdafiəçi 8,5 milyon avro “transfermarkt” dəyərindədi.

Nərimanın yeni baş məşqçisi isə Vilfrid Nansidi. Adətən, 4-3-3 taktiki sxeminə üstünlük verir, amma klassik 4-4-2-dən də yararlanır. Postsovet məkanı ölkələrindən iki futbolçu “Kolambus Kryu”nun heyətində yer alır. 19 yaşlı belaruslu Stanislav Lapkes komandanın 5-ci qapıçısıdı. Adı heç iştirak ərizəsinə də salınmır. Digəri isə ukraynalı Yevgen Çeberkodu.

Nərimana yeni klubunda uğurlar arzulayırıq. Səsi okeanın o tayından bu tayına gəlib çatsın!

MÜZƏFFƏR QULUZADƏ