“Bəli, bir çoxları bizdən bu nəticəni gözləmirdi. Çünki böyük büdcəyə sahib olan komandalara qarşı mübarizə aparırıq. Hətta bəzi rəqiblərin maliyyə gücü bizdən iki-üç dəfə çoxdu. Sadəcə, yaratdığımız komanda, işə yanaşma tərzi, futbolçuların performansı qış fasiləsinə 2-ci pillədə yollanmağımıza səbəb oldu. Çalışacağıq ki, sabit nəticələr qazanmağa davam edik. Daha böyük uğurlar qazanmaq istəyirik. Bunun üçün mütləq güclənməliyik. Fikrimizdə bir neçə yeni futbolçu transfer etmək planı var. Bunu həyata keçirsək, daha qüvvətli olacağıq. Çünki bəzi mövqelərdə boşluqlar var. Azı 3-4 futbolçu almağa məcburuq. İnanırıq ki, fasilədə istəyimizə çatacağıq. Bununla belə, qarşımıza çempion olmaq hədəfi qoyulmayıb. Məqsəd yaxşı komanda formalaşdırmaq və bütün rəqiblərə qarşı layiqincə mübarizə aparmaq idi. Bunu bacardıq. İnanırıq ki, bu cür davam edəcəyik. Sona qədər vuruşmalıyıq. Onsuz da əsas rəqiblərin büdcəsi bizdən qat-qat çoxdu. Əlimizdən gələni edəcəyik ki, mövsümü maksimum yuxarı sıralarda bitirək. Çempionluq sözü ağır sözdü. Bizi uzun marafon gözləyir. Onu da bildirim ki, futbolçumuz Xəyyam Məmmədli U-21 millisinin yanvar ayı üçün planlaşdırılan təlim-məşq toplanışına dəvət edilib. Bu, bizim üçün çox böyük uğurdu. Çünki “Baku Sportinq” tarixində ilkə imza atıldı. Çalışacağıq ki, milli komandaya dəvət alan futbolçularımızın sayını artıraq”.

“Futbolçular ilin son matçından sonra istirahətə buraxılıb. Yanvarın 4-də bir araya gələcəyik və məqşlərə start verəcəyik. Mövsümün qalan hissəsinə daha yaxşı hazırlaşacağıq. Bu çərçivədə dörd yoxlama oyunu keçirəcəyik”.