"Şamaxı" Misli premyer-liqasının ilk turu çərçivəsində "Neftçi"nin meydanından heç-heçəylə ayrıldı - 1:1.

"Football-plus.az" xəbər verir ki, "şirlər"in baş məşqçisi Ayxan Abbasov oyunsonrası mətbuat konfransında jurnalistlərin suallarını cavabladı

- Hamınızı xoş gördük. Darıxmışdıq. Hamını çempionatın başlaması münasibətilə təbrik edirəm. İlk oyun idi. Bu üzdən, rəqibi təhlil etməkdə çətinlik çəkdik. Bizim komanda da yeni oyunçular var idi. İlk turda "Neftçi"yə qarşı oynamaq çətin idi. Birinci hissə daha yaxşı keçdi. İkinci hissədə yorğunluq oldu. Heyətdə dəyişikliklər etdik. Bu mövsüm daha yaxşı olmaq istəyirik. Bunun üçün daha çox əziyyət çəkməliyik. Bizi səfərdə tək qoymayan şamaxılı azarkeşlərə təşəkkür edirəm. Hər halda, "Neftçi" kimi komandayla mübarizədə bir xal qazandıq.

- Sanki heyətdə yetərli sayda futbolçu yoxdu. Bu məqam mövsüm ərzində komanda üçün çətinlik yaradacaqmı? Yeni transferlər gözlənilir?
- Ehtiyat qüvvəmiz gənclərdən ibarətdi. Mövsüm ərzində çəkinmədən onlara şans verəcəyik. Bəllidi ki, qalan oyunçular kimi olmayacaqlar. Amma büdcəmizə görə çıxış etməliyik. Klub olaraq qarşımıza başqa məqsəd qoymuşuq. Hamı avrokuboklar uğrunda mübarizə apara bilməz. Edqar, Oruc, Emil kimi futbolçularımız var. İnanıram ki, hər biri yaxşı performans göstərəcək.

- Edqar ehtiyat oyunçular skamyasında idi. Bu, nəylə bağlı oldu? Hələ 90 dəqiqə oynamağa hazır deyil?
- O bizi qane etmək üçün çox çalışmalıdı. Heyətdə rəqabət artıb. Edqara inanırıq.

- Azı iki dəfə Elçin Məsiyevlə mübahisə yaşadız. Nədən narazı idiz?
- İlk növbədə Elçini təbrik etdim. Qürurumuzdu. Ondan xahiş etdim ki, xırda foulları az versin. Mənə sarı vərəqə verdi.

- Həm "Şamaxı"nın, həm də "Neftçi"nin start heyətində iki yerli oyunçu var idi. Bu, sizi həm U-21 millimizin baş məşqçisi, həm də azərbaycanlı mütəxəssis kimi narahat etdimi?
- Həmişə demişəm ki, yerli futbolçuya daha çox şans verilməlidi. Ancaq bu durumla mən də razılaşmalıyam. Qərar verilib. Nəticəni gözləməliyik. Hamı transferlər edir. Bu məsələni mövsümün sonunda müzakirə edərik. Fikirlərimi deyərəm.

- Heyəti quranda klubun gələcəyini fikirləşsəz də, U-21 yığmamızın oyunçularının təcrübə qazanması üçün onlara da şans vermək məcburiyyətindəsiz. Bu məqam üzərinizdə ikiqat təzyiq yaradır?
- Daxilimdə olan mübarizədi. Ötən mövsüm U-21 millisinin baş məşqçisi deyildim. Həmin vaxt da hən rəhbərliyin, həm də mənim gənc oyunçuların taleyiylə bağlı narahatlığımız var idi. Prinsipimiz gəncləri yetişdirməkdi. Komandada rəqabət var. Bəzi oyunlarda risk alacağıq. Amma unutmayaq ki, "Şamaxı"nı premyer-liqada saxlamalıyıq. Hadisələrin axarı imkan versə, gənclərə daha çox şans veriləcək.

KƏNAN BAHADIR