“Rəqibin ötən mövsümdəki 6-7 oyununu izləmişik” - "Nyu Seynts"in baş məşqçisi
"Sabah" bu gün Çempionlar Liqasının 1-ci təsnifat mərhələsinin oyununda “Nyu Seynts”i qəbul edəcək.
Qonaqların baş məşqçisi Kreyq Harrison mətbuat konfransı keçirib. O, ilk növbədə rəqibin gücünə bələd olduqlarını və Bakıdan müsbət təəssüratla ayrılacaqlarını vurğulayıb:
"Bilirik ki, bizi çətin oyun gözləyir. "Sabah"ın daxili çempionatda "Qarabağ"ı üstələyərək çempion olması çox şey deyir. Tarixən "Qarabağ" həm Avropa Liqasında, həm də Çempionlar Liqasında həmişə çox yaxşı çıxış edən komanda olub. Onlar bu il də Çempionlar Liqasında "Benfika", "Nyukasl" kimi böyük klublara qarşı yaxşı oyun sərgilədilər. Buna görə də "Qarabağ"ı qabaqlayaraq çempion olan "Sabah"ın nə qədər güclü komanda olduğunu çox yaxşı dərk edirik".
Mütəxəssis həmçinin komandasındakı zədəlilərin durumu və "Sabah" haqda danışıb:
"Bəli, bir neçə zədəli futbolçumuz var, lakin son vaxtlar yeni zədələnən kimsə yoxdu. Bunlar son altı həftədə və ya ötən mövsümün sonunda zədələnən oyunçularımızdı. Hazırkı vəziyyətdə heyətimizdə yeni itki yoxdu. Rəqibin ötən mövsümdəki 6-7 oyununu izləmişik. Təbii ki, komandaya yeni oyunçular gəlib və bəzi icarəyə götürülmüş futbolçuların transferi rəsmiləşdirilib. Biz onları da təhlil etmək imkanı tapdıq. Rəqibin heyətində beynəlxalq səviyyəli, güclü klublarda oynamış, böyük təcrübəyə malik, həqiqətən top səviyyəli futbolçular var. Bizi çox çətin sınaq gözləyir".
Harrison ölkəmizin paytaxtı haqda da xoş sözlər işlədib:
"Bakı heyrətamizdi. Heyətimizdən yalnız 2-3 nəfər uzun illər əvvəl Uels və İrlandiya milli komandaları ilə bura gəlib. Lakin bütövlükdə komanda olaraq, daha əvvəl burada olmamışdıq. Bakı həqiqətən də olduqca gözəl şəhərdi".
Digər xəbərlər
