Avrokuboklarda 3-cü təsnifat mərhələsinin ilk oyunları başa çatdı.

Azərbaycan klubları da növbəti oyunlarını keçirdi. Bildiyiniz kimi, "Qarabağ" və "Sabah" qələbə qazandı, "Neftçi" uduzdu.

İki klubumuzun qələbəsi ölkənin UEFA reytinqindəki əmsallarını 16, 250-yə çatdırdı. Azərbaycan sıralamada 29-cu yerdədi və 28-ci Slovakiyadan 0,250 əmsal geri qalır. Bu o deməkdi ki, avrokuboklarda qazanılacaq növbəti qələbə siyahıda irəliləməyimizə səbəb ola bilər.

Bu mövsümə 29-cu sırada başlamışıq və bir pillə irəliləmək üçün yaxşı şans var. 28-ci pilləni tutan Slovakiya hazırda avrokuboklarda 2, Azərbaycan isə 3 komanda ilə təmsil olunur. "Qarabağ" və "Sabah" ilk oyunda qələbə qazanıb və növbəti mərhələ şansları daha çoxdu. "Neftçi" isə "Beşiktaş"a uduzub və yəqin ki, bakılılar üçün avrokubok mövsümü başa çatacaq. Slovakiya komandalarının oyunlarına da nəzər salaq. “Slovan” ÇL-in 3-cü təsnifat mərhələsinin ilk oyununda evdə Hayfa Makkabisinə 1:2 uduzub və səfərdə bu məğlubiyyətin əvəzini çıxmağa çalışacaq. Konfrans Liqasında yarışan Trnava “Spartak”ı isə səfərdə “Lex”ə 1:2 uduzub.
27-ci pillədə qərarlaşan, 17 xala malik Bolqarıstanın da avrokuboklarda iki komandası qalıb. “Luqoqorets” Avropa Liqasında (Astana – 1:2), “Levski” isə Konfrans Liqasında (Hapoel B-Ş – 0:0) səfər oyununa çıxıb.

Beləliklə, bu mövsüm Azərbaycanın UEFA reytinqində ən azı 2 pillə irəliləməsi istisna olunmur. Bunun üçün klublarımızdan ən azı biri qrup mərhələsinə vəsiqə qazanmalı və ya onlar ümumilikdə 3 qələbə əldə etməlidi.

İLKİN SULTANLI