Acun ''Fənərbaxça'' - ''Hall Siti'' oyunu haqda danışdı
''Fənərbaxça''nın növbəti yoxlama oyunundakı rəqibi bəlli olub. Joze Mourinyonun başçılığı altında yeni mövsümə hazırlaşan İstanbul nəhəngi sabah doğma ''Ülkər'' stadionunda Acun Ilıcalının sahibi olduğu çempionşip təmsilçisi ''Hall Siti'' ilə qarşılaşacaq.
Acun həm də ''sarı-lacivərdlilər''in vitse-prezidentidi. Bu, ''Fənər''in bu yay keçirəcəyi 5-ci yoxlama oyunu olacaq. Komanda buna qədər ''Petrolul'' (2:1), ''Admira'' (1:1), ''Hayduk'' (0:1) və ''Strasbur'' (4:0) ilə qarşılaşıb. ''Hall Siti'' son illərdə olduğu kimi bu il də Türkiyədə hazırlıq keçir. Komanda iyulun 10-dan etibarən İstanbuldadı. İyulun 13-də ''pələnglər'' ''Kasımpaşa'' ilə 1:1 bərabərə qalmışdılar. ''Hall Siti'' ötən yay hazırlıq oyununda ''Qalatasaray''ı 4:3 məğlub etmiş, 2022-nin yayında isə ''Fənərbaxça''ya 0:2 uduzmuşdu. Bu arada türkiyəli həmkarlarımızla görüşən Acun qarşıdakı oyun haqda danışıb: '
'Sabah ''Fənərbaxça'' ilə qarşılaşacağıq. Bir klubda başqan, digər klubda vitse-prezidentəm. Futbolda dünyasında çox nadir rast gəlinən bir durumdu. Amma digər tərəfdən gözəl bir şeydi. Çox şanslı insanam. Mənə belə günü nəsib etdiyi üçün Allaha şükr edirəm. Uşaqlıq sevgim ilə sahib olduğum komanda qarşılaşır. Oyunu gözəl duyğularla izləyəcəm. Ötən yay da Türkiyədə toplanış keçmişdik. Sonra da çempionşipdə mövsümü 7-ci pillədə bitirdik. Bu, çoxları üçün sürpriz oldu. Türkiyə toplanışları bizim üçün faydalı keçir. Futbolçular həm dəyişiklik yaşayır, həm də motivasiya olunurlar. Yenə hədəfimiz premyer-liqaya yüksəlməkdi. Bunun üçün əlimizdən gələni edəcəyik. ''Fənərbaxça''nın çempionluğunu istəyirəm, yoxsa, ''Hall Siti''nin premyer-liqaya yüksəlməsini? Çətin və maraqlı sualdı. Bu, iki övladı olan valideynə hansı övladını daha çox sevməsi ilə bağlı verilən suala bənzəyir. Təbii ki, bunlardan hər ikisinin də baş verməsini istəyərəm''.
ƏLİ
