''Fənər''də bir ay öncə vəzifəyə gətirilən futbol koordinatoru istefa verdi
Yeni mövsümün hazırlıqlarını davam etdirən ''Fənərbaxça'' ilə bağlı yenə sürpriz bir istefa xəbəri var.
Məlum olduğu kimi İstanbul nəhəngində ötən ay bəzi dəyişikliklər baş vermişdi. Okan Özkan futbol koordinatoru vəzifəsinə gətirilmişdi.
Əli Koçun başqanlığının ilk dönəmindən etibarən, yəni 7 ilə yaxındı, klubda olan, son iki mövsümdə idman direktorunun köməkçisi vəzifəsini icra edən Okan Özkanın artıq futbol direktoru Devin Özək ilə birlikdə çalışacağı açıqlanmışdı. Ancaq Yağız Sabuncuoğlunun xəbərinə görə Okan Özkan sürpriz şəkildə öz istəyi ilə istefa məktubunu rəhbərliyə təqdim edib!
Bu da o deməkdi ki, artıq transferlərə yalnız Devin Özək cavabdehlik daşıyacaq. Maraqlıdı ki, Əli Koç mayın 7-də ''TRT Spor''un canlı yayınında qonaq olan Okan Özkanı tərifləyərək bunları demişdi:
''Okan Özkan Türkiyənin ən yaxşı idman direktoruna çevrilmək yolunda əmin addımlarla irəliləyir. Bunu da hər kəsin diqqətinə çatdırım''.
Ancaq indiyə qədər ''Fənər''dən istefa ilə bağlı heç bir rəsmi açıqlama gəlməyib. Bu yerdə xatırladaq ki, ötən ay Acun Ilıcalı da sürpriz şəkildə vitse-prezident vəzifəsindən ayrıldığını açıqlamışdı.
