Qurban Qurbanovun əsas komandadan qovduğu Elvin Cəfərquliyevlə bağlı maraqlı iddia ortaya atılıb. Bəzi saytlarda və sosial şəbəkələrdə yayılan xəbərlərə inansaq, sol cinah müdafiəçisi karyerasını “Neftçi”də davam etdirəcək.

Əlbəttə, bu, ilk baxışdan daha çox pul qazanmaq istəyən futbolçunun klubunu dəyişməsi kimi görünə bilər. Lakin dərindən düşünsək, ən yaxşı yerli futbolçunun səhv qərarın astanasında olduğunu anlaya bilərik.

Elvin təkcə çılğın, aqressiv və şıltaq xarakteriylə yox, həm də oyunu, enerjisi, ciddi uğurlarıyla yaddaşımıza həkk olunub. Zarafat deyil, “Futbol+”in ümummilli sorğusunda 2025-ci ilin ən yaxşı azərbaycanlı futbolçusu seçilən müdafiəçi həm də Çempionlar Liqasında “Kopenhagen”lə matçın ən yaxşısı olub. Hələ onu demirik ki, bu turnirin əsas mərhələsinin 7-ci turunda rəmzi heyətə düşüb. Elvinin ÇL-in pley-offunda qol vuran ilk azərbaycanlı ünvanının daşıdığını da unutmamalıyıq, “FİFA Series – 2026”nın ən yaxşı futbolçusu seçildiyini də.

Təbii ki, belə uğurlara imza atan futbolçu yalnız legioner həyatı yaşamaq haqda düşünməlidi. Başqa cür də ola bilməz. Bəli, bəlkə də gələn il 90 illik yubileyini qeyd edəcək “Neftçi” bunu çempionluqla taclandırmaq istəyir və bu səbəbdən Elvin kimi istedadlı futbolçuyla güclənmək niyyətindədi. Elvin bu yolla varlana bilər. Ancaq bu gün pul onun üçün ikinci, bəlkə də üçüncü pillədə olmalıdı. Yoxsa potensialına rəğmən, rahatlığı seçən, qısamüddətli “partlayış”dan sonra sadə futbolçuyla çevrilən onlarla azərbaycanlıdan biri olacaq.

Kəsəsi, Elvin, “Qarabağ”dan get, amma “Neftçi”yə yox! Səsini xarici çempionatlardan eşitməyin vaxtı çatıb!

KƏNAN BAHADIR