“Qarabağ” bu gün Çempionlar Liqasının liqa mərhələsində növbəti oyununu keçirəcək. 3-cü tur çərçivəsində “Atletik”in qonağı olacaq komandamızdan, təbii ki, azı bir xal gözləyirik.

Bəli-bəli, arzumuz La Liqanın nəhənglərindən olan Bilbao təmsilçisiylə azı-heç-heçə edə biləcəyimiz yönündədi. Niyə? Axı “Qarabağ” 25, “Atletik” isə nə az, nə çox - 370 milyon avro dəyərindədi. Öz aramızdı, “qırmızı-ağlar” Azərbaycan premyer-liqasından (110,50 milyon avro) 3 dəfədən artıq bahadı! Çempionatımızın ən baha futbolçusu Kadi Borges 2,5, “şirlər”in ən baha oyunçusu Niko Uilyams isə 70 milyon avrodu. Bəs bizi ümidləndirən nədi? Təbii ki, bazar dəyərlərinin, sadəcə, kağız üzərində olduğunu dəfələrlə sübuta yetirən “Qarabağ”!

Zarafat deyil, “köhlən atlar” Çempionlar Liqasının 2025/26 mövsümündə keçirdiyi 8 matçın 7-də qələbə qazanıb. Xatırladaq ki, ağdamlılar indiyə qədər “Şelburn” (3:0, 1:0), “Şkendiya” (1:0, 5:1), “Ferentsvaroş” (3:1, 2:3), “Benfika” (3:2) və “Kopenhagen”lə (2:0) qarşılaşıb. Göründüyü kimi, yalnız bir məğlubiyyət qeydə alınıb və bu, “köhlən atlar”ın tarix yazmasına mane olmayıb. Bu azmış kimi, topların nisbəti də göz qamaşdırır – 20:7.

Əbəs deyil ki, La Liqa kimi çempionata sahib olan ölkənin idman mediası artıq “Qarabağ”ı sürpriz komanda saymır. Komandanın müəyyən sisteminin formalaşdığını və nəticələrin məhz həmin sistemin bəhrəsi olduğunu etiraf edirlər. Və uğurlardan danışanda 2008-ci ildən bəri “köhlən atlar”ın baş məşqçisi, görülən işlərin memarı olan Qurban Qurbanova xüsusi yer verirlər.

İstənilən halda, “Qarabağ” bu gün tarixinin ən güclü dönəmini yaşayır. Komandamıza nəinki hörmət edirlər, hətta özlərinin favorit olduqlarını dilə gətirmək istəmirlər. Təbii ki, belə davranış həm də uzun illər ərzində formalaşan futbol mədəniyyətinin təzahürüdü, ancaq reallıq da məhz bu yöndədi! “Qarabağ”ın uğurları artıq sürpriz sayılmır və bu gün axşam Bilbaodan qələbə xəbəri gələcəyi təqdirdə əvvəlki kimi təəccüblənməyəcəyik. Ancaq söz veririk ki, əvvəlkindən qat-qat artıq sevinəcəyik! Çünki məlum ilk “24-lük” xəyalının gerçəkləşməsi yönündə çox iri addım atmış olacağıq.

Odu ki, atalar üçdən deyib, “Qarabağ”! Sevindir bizi, nə olar...

KƏNAN BAHADIR