''Qalatasaray'' bir tərəfdən bu qış heyətini gücləndirmək haqda düşünürsə, digər tərəfdən qapıçı axtarışlarını da davam etdirir. Çünki qeyri-adi bir şey baş verməsə, Fernando Muslera mövsümün sonunda Türkiyədən ayrılacaq.

''Football-plus.az'' xəbər verir ki, İstanbul nəhəngi ''Eyüpspor''un qapıçısı Berke Özəri ciddi şəkildə diqqət mərkəzində saxlayırdı. Hətta danışıqlar da başlamışdı. Bunu ''Eyüpspor'' prezidenti Fatih Kulaksız da təsdiqləmişdi. O, Berke ilə İstanbulun digər nəhənglərinin də maraqlandığını qeyd etmişdi.

Amma Türkiyə mətbuatının yazdığına inansaq, ''Cim-Bom'' 24 yaşlı bu qapıçıdan vaz keçmək qərarına gəlib. Bunun bir neçə səbəbi var. Berke bu mövsüm xüsusilə ''Qalatasaray''la səfər oyununda (2:2) inanılmaz performans sərgiləmiş və 12 seyvlə mövsümün rekordunu qırmışdı. Amma həmin oyunda onun ''sarı-qırmızılar''a qarşı bəzi hərəkətlərə yol verməsi və bir epizodda topu bu komandanın ehtiyat zonasına tərəf bilərəkdən vurması diqqət çəkmişdi.

Digər səbəb odu ki, Berkenin əvvəlki illərdə ''Qalatasaray''ın əleyhinə təzahüratlar səsləndirdiyi və sosial şəbəkələrdə paylaşımlar etdiyi üzə çıxıb. Və ən əsası bu qapıçının haqlarının 40 faizi ''Fənərbaxça''ya məxsusdu. Türkiyə çempionu bütün bu məqamları və transfer olunacağı halda fanatların ona münasibətinin birmənalı olmayacağını nəzərə alaraq bu transferdən vaz keçib.

Daha öncə ''Fənər''in də şərəfini qorumuş Berke bu mövsüm superliqada 17 oyuna çıxıb və 7 dəfə qapısını toxunulmaz saxlayaraq 16 qol buraxıb.

ƏLİ