Bu mövsüm ''Ayntraxt''ın aparıcı üzvünə çevrilən və oyunu ilə diqqət çəkən Can Uzunla bağlı yeni xəbər var. Frankfurt klubu bu istedadlı futbolçunun satış məbləğini müəyyənləşdirib.

''Skay Sports''un xəbərinə görə bundesliqa klubu Türkiyə yığmasının üzvünü 80 milyon avrodan aşağı qiymətə satmamaq qərarına gəlib! Xəbərdə bu məbləğin çox yüksək olduğu qeyd olunub. Amma bildirilir ki, bu qərarı ''Ayntraxt''ın idman direktoru Markus Kröşe qəbul edib.

Maraqlıdı ki, ''Ayntraxt'' 19 yaşlı yarımmüdafiəçini 2024-ün yayında ''Nürnberq''dən cəmi 11 milyon avroya transfer edib. ''Transfermarkt''a inansaq, futbolçunun indiki dəyəri isə 18 milyon avro civarındadı. Bu klubda ilk mövsümü adaptasiyaya sərf edən Can cari mövsümdən əsas heyətin dəyişilməz üzvünə çevrilib. O, 2025/26-da iştirak etdiyi 9 rəsmi oyunda aktivinə 6 qol, 4 məhsuldar ötürmə yazıb. Bu qollardan birini Çempionlar Liqasında ''Qalatasaray''ın qapısına vurub.

Can Uzuna indidən bir çox klublar maraq göstərir. Onun başqa kluba transferi 80 milyon avroya baş tutsa bu futbolçu tarixə düşəcək. Belə ki, Can ən yüksək məbləğə bir klubdan başqasına keçən türkiyəli futbolçuya çevriləcək.