Türkiyə Futbol Federasiyasının yeni rəhbərliyi əvvəlki rəhbərliyin dönəmində qəbul edilmiş qərarları bir-bir dəyişməkdə davam edir.

Məlum olduğu kimi İbrahim Hacıosmanoğlu seçkilərdə Mehmet Büyükekşiyə qalib gəldikdən sonra 2024/25 mövsümü üçün legioner limitini 12-dən 14-ə yüksəltmişdi. İndi də Hacıosmanoğlu başqa bir qərarı ləğv edib.

Ötən yay TFF Büyükekşinin dönəmində superliqa klublarına Azərbaycan, Qazaxıstan, Qırğızıstan, Özbəkistan və Türkmənistandan ümumilikdə 1 futbolçunu yerli statusunda iştirak ərizəsinə salmağa icazə vermişdi. Eləcə də hər hansı bir səbəbə görə Türkiyə vətəndaşlığından imtina edən futbolçunun yerli statusunda oynamasına icazə verilmişdi.

Yeni rəhbərlik bu qərarı ləğv edib. Yəni artıq azərbaycanlı futbolçu Türkiyədə yerli statusunda oynaya bilməyəcək! Amma bu, hazırda müqaviləsi davam edən futbolçulara aid deyil. Yalnız futbolçu ilə yeni müqavilə imzalayarkən qərar qüvvəyə minəcək. Ona görə də ''Qalatasaray''lı Kərəm Dəmirbay və ''Beşiktaş''lı Baxtiyor Zaynutdinov qarşıdakı mövsümdə də yerli futbolçu statusunda çıxış etməkdə davam edəcəklər.

ƏLİ