Türkiyə Futbol Federasiyasında yığmaya cavabdeh yönətici kimi çalışan Həmit Altıntop barədə maraqlı məlumatlar gəlməkdədi.
Bilindiyi kimi, Türkiyə yığmasına almaniyalı Ştefan Kuntsu məhz Altıntop gətirib. Lüksemburq və Farer adaları ilə oyunlarda qeydə alınan nəticələrdən sonra Altıntop Kuntsun qovulmayacağını bildirmiş, əksinə, canlı yayında yumruğunu masaya vurub ona dəstək vermişdi. İndi də Türkiyə mətbuatının yazdığına inansaq, Altıntop Hakimlər Komitəsinə (HK) də ''barmaq eləmək'' istəyir. Belə ki, o, komitənin başına almaniyalı (!) Markus Merki gətirmək arzusundadı və bu niyyətini federasiya prezidenti Mehmet Büyükekşiyə də bildirib. Əslində HK-nın başına əcnəbi futbol adamının gətirilməsi yeni ideya deyil. Türkiyə futbolunda uzun illərdi bu məsələ müzakirə olunur. Komitənin başına gətirilməsə də, baş məsləhətçi vəzifəsini uzun müddətdi əcnəbilər icra edir. Məsələn, Nihat Özdəmirin federasiya başqanı olduğu dönəmdə HK-nın baş məsləhətçisi Devid Elleray idisə, hazırda bu vəzifəni Hyu Dallas icra edir. Şayiələrə inansaq, Elleray Türkiyədən ayrılarkən işlədiyi dönəmə aid geniş bir raport hazırlamış və orda HK-nın başına əcnəbi şəxsin gətirilməsinin vacibliyini qeyd etmişdi. Hazırda HK-nın sədri vəzifəsini Səbri Çəlik icra edir. Mehmet Büyükekşinin hələ ki bu mövzuda mövqeyi bəlli deyil. Altıntop planını həyata keçirmək üçün hələlik onun razılığını ala bilməyib. Amma göründüyü kimi, Almaniyada doğulan Altıntop Türkiyə futbolunu belə desək, almanlaşdırmaq niyyətindədi. Markus Merk Türkiyə futbolu üçün heç də yad sima deyil. Ötənlərin məşhur hakimi bir neçə il öncə ''Lig TV'' kanalında şərhçi kimi çalışırdı və Türkiyə futbolundakı ab-havadan məlumatı var.