Almaniyada yaxın keçmişdə iddialı sayılan klubların aşağı liqaya yuvarlanması ənənəsi davam edir.

2018-də ''Hamburq'' tarixində ilk dəfə elitanı tərk etmişdisə, 2021-də ''Şalke-04''ün 33 illik, 2023-də ''Herta''nın 10 illik bundesliqa macərası başa çatmışdı. İndi də bu siyahıya ''Volfsburq'' qoşuldu. Çox zəif mövsüm keçirən və çətinliklə 16-cı pilləni tutaraq pley-offda oynamağa haqq qazanan ''canavarlar'' burda ümidləri doğrulda bilməyərək böyük fiaskoya uğradı.

''Paderborn'' ilə evdəki ilk duel qolsuz başa çatdıqdan sonra dünən cavab oyunu keçirildi. ''Volfsburq'' artıq 3-cü dəqiqədə hesabı açsa da, matçın sonrakı axarı komanda üçün uğursuz alındı. Yoahim Mehle artıq 14-cü dəqiqədə qırmızı vərəqə almaqla komandanı azlıqda qoydu. ''Paderborn'' hələ ilk yarıda hesabı bərabərləşdirdi. Böyük üstünlüyə malik olan bu kollektiv layiq olduğu qələbə qolunu 100-cü dəqiqədə vurdu. Meydan sahibləri 120 dəqiqəlik mübarizəni qapıya 30-dan çox zərbə vurmaqla və 3,7 xG ilə tamamladılar! Qonaqlar isə yalnız 0,14 xG yaxalaya bildilər.

Beləliklə, ''Paderborn'' 6 illik fasilədən sonra elitaya yüksəldi. ''Volfsburq''un isə 29 illik bundesliqa macərası başa çatdı. Komanda elitaya 1997-də yüksəlmişdi. 2009-da ''canavarlar'' tarixlərində ilk dəfə bundesliqanı, 2015-də isə ölkə kubokunu qazanmışdılar.

Maraqlıdı ki, heyətində Eriksen, Mehle, Lindstrem kimi ulduzlar olan ''Volfsburq'' bu mövsüm bundesliqada maaş büdcəsinə görə 5-ci pillədə idi. Bu baxımdan komandanın başına gələnləri böyük sürpriz adlandırmaq olar.