Futbolumuzun müstəqillik dönəminin ən parlaq yetirmələrindən biri Mahir Emreli Almaniyada xarüqələr yaratmaqda davam edir.

Onun şərəfini qoruduğu “Nürnberq” bu gün “Hamburq”un qonağı oldu. Bir qədər əvvəl başa çatan oyunda hesabı meydan sahibləri açsa da (Elfadli, 15-ci dəqiqə), məhz həmvətənimiz 63-cü dəqiqədə cərimə meydançası daxilindən sol ayaqla yuxarı küncü “nişan almaqla” hesabı bərabərləşdirdi. “Nürnberq”in baş məşqçisi Miroslav Klozeni növbəti dəfə Mahiri oyunun gedişində, daha dəqiqi, 68-ci dəqiqədə əvəzlədi. 65-ci dəqiqədə sarı vərəqə ilə də cəzalanan Mahir qeyd-şərtsiz komandasının heyətində ən yaxşılardan biri və bəlkə də birincisi idi. Bununla da xalını 17-yə çatdıran “Nürnberq” 6-8-ci yerləri bölüşür.

Ardıcıl 3-cü, ölkə kubokunu da nəzərə alsaq, 4-cü oyunda fərqlənən Mahir isə bombardirlər yarışında hələ liderlərdən uzaqdı. Ümumiyyətlə, postsovet məkanından iki futbolçu 2-ci bundesliqada çox xoş təsir bağışlayır. Gürcü Budu Zivzivadze 7 xalla bombardirlər siyahısında liderlərdən biridi. Mahirin hələ cəmi 3 qolu olsa da, irəliləyə biləcəyinə şübhə yoxdu. Belə ola həmişə!

Maraq üçün deyək ki, 2-ci bundesliqanın oyunların yüksək azarkeş marağı ilə müşayiət olunur. Məsələn, “Nürnberq”in “Hamburq”la səfər oyununu 57 min azarkeş izləyirdi.