Çempionşipin pley-offunda ilk finalçı bəlli oldu. Yarımfinalın cavab oyununda ''Hall Siti'' ''Milluoll''un qonağı oldu.

Bu komandalar arasında ilk görüş qolsuz başa çatmışdı. ''Den Stedium''da baş tutan cavab oyunu da gərgin keçdi. İlk yarıda qapılara qol vurulmadı və görüşdə əsas hadisələr fasilədən sonraya təsadüf etdi. ''Hall Siti'' 64-cü dəqiqədə Muhammed Bellumi və 79-cu dəqiqədə Co Gelhardtın qolları ilə 2:0 hesablı qələbə qazandı.

Beləliklə, türkiyəli iş adamı Acun Ilıcalının sahibi olduğu ''pələnglər'' finalda oynamağa haqq qazandılar. Həlledici pley-off mayın 23-də ''Uembli'' stadionunda keçiriləcək. ''Hall Siti'' finalda ''Sauthempton'' - ''Midlsbro'' cütünün qalibi ilə qarşılaşacaq.

Maraqlıdı ki, ''sarı-qaralar'' ötən mövsüm yalnız top fərqi sayəsində çempionşipdə qalmağı bacarmışdılar. İndi isə Sergey Yakiroviçin çalışdırdığı klubu premyer-liqaya vəsiqədən cəmi 1 qələbə ayırır. ''Hall Siti'' daha öncə 2008 və 2016-cı illərdə pley-offda oynamış, hər iki halda elitaya yüksəlməyi bacarmışdı.