Srağagün və dünən Almaniya kubokunda 1/8 final mərhələsinin oyunları keçirildi. Qeyd edək ki, bu mərhələyə qədər elitanın cəmi 6 komandası gəlib çıxa bilmişdi.

"Football-plus.az" xəbər verir ki, bu, turnirin tarixinin antirekordunun təkrarıdı. Daha öncə 1992/93-də də 1/8 finalda cəmi 6 bundesliqa təmsilçisi mübarizə aparmışdı. İlk oyun günündə iki bundesliqa klubu bir-biri ilə üz-üzə gəldiyindən elitanın daha bir təmsilçisi azaldı. Söhbət “Volfsburq”dan gedir. “Canavarlar”ın qara günləri davam edir. Bundesliqada son 7 turda cəmi bir qələbə qazanmaqla 11-ci pilləyə qədər geriləyən Niko Kovaçın komandası kubokda da mübarizəni dayandırmalı oldu. Əvvəlki mərhələdə son iki ilin qalibi “Leyptsiq”i mübarizədən kənarlaşdıran “Volfsburq” bu dəfə Münhenqladbax “Borussiya”sı səddini aşa bilmədi. Qonaqların bir sıra real fürsətləri əldən verdikləri qarşılaşmada hər şey penalti seriyasına doğru gedirdi. Amma 120-ci dəqiqədə başla fərqlənən Kone qonaqları şoka saldı. Günün digər matçlarına gəlincə, bu mərhələyə yüksələn yeganə həvəskar komanda “Homburq”, gözlənildiyi kimi, 2-ci bundesliqanın lideri “Sankt Pauli”yə müqavimət göstərə bilmədi. 2-ci bundesliqa təmsilçilərinin duelində “Kayzerslautern” “Nürnberq”in müqavimətini 2-ci hissədə qırdısa, “Fortuna” “Maqdeburq” səfərinin son anlarında mükəmməl geridönüşə imza atdı.

1/8 final
Borussiya M – Volfsburq 1:0, əlavə vaxtda
Kone, 120.
Kayzerslautern (D-2) – Nürnberq (D-2) 2:0
Taçi, 75. Axe, 78.
Maqdeburq (D-2) – Fortuna (D-2) 1:2
Barış Atik, 15 – Nemeç, 87; 90+2.
Homburq (həv.) – Sankt Pauli (D-2) 1:4
Mendler, 28 – Val, 24. Saad, 64. Hartel, 69. Eqqeştayn, 73.