Premyer-liqanın 29-cu turunun "Qəbələ" - "Zirə" qarşılaşmasında qonaqların heyətində əvəzlənən Rüstəm Əhmədzadə meydandan çıxarkən ehtiyat oyunçular skamyasını yumruqladı.

"Football-plus.az" xəbər verir ki, futbolçu həmçinin həkimlər onun ayağına müdaxilə etmək istəyərkən əlindəki bandajı yerə tulladı. "Qartallar"ın kapitanı Qismət Alıyev isə oyun epizodlarının birində meydan sahiblərinin futbolçusu İsnik Alimiyə qarşı kobud oynadı. Bu zaman yerli azarkeşlər futbolçunu fitə basdı. Oyun bitəndən sonra isə Qismət onlara tərf getdi və "burda can qoymuşam, ona hörmət edin" deyərək üsyan etdi. Hər iki futbolçunun narazılığı ilə bağlı özləriylə əlaqə saxlamaq istəsək də, mümkün olmadı. Bü üzdən "Zirə"nin mətbuat katibi Elmar Abdullazadənin məsələyə aydınlıq gətirməsini istədik:

"Futbol emosiya oyunudu və hər bir futbolçu bəzən emosiyaların cilovlaya bilmir. Oyunun gedişindən asılı olaraq, oyunçu əsəbləşə, cılğın reaksiya verə bilər. Bu həm ölkə, həm də dünya futbolunda tez-tez rast gəlinən haldı".

ABDULLA İSMAYILOĞLU