Səudiyyə Ərəbistanı çempionatının 32-ci turunda çempionluğa əsas namizədlər - ''Əl-Nəssr'' ilə ''Əl-Hilal'' üzə gəldi.

''Əl-Nəssr'' doğma ''Əl-Əvvəl Park''da qalib gələcəyi təqdirdə Kriştiano Ronaldonun dönəmində nəhayət, ilk çempionluğunu rəsmiləşdirəcəkdi. Gözlənildiyi kimi gərgin keçən qarşılaşmada meydan sahibləri Məhəmməd Simakanın qolu ilə fasiləyə minimal üstünlüklə yollandılar.

Görüşdə uzun müddət başqa qol olmadı. ''Əl-Nəssr'' cəbhəsi böyük səbirsizliklə final fitini gözlədiyi bir məqamda inanılmaz bir olay yaşandı. Əsas vaxta əlavə olunmuş sonuncu - 8-ci dəqiqədə rəqibin autdan topu oyuna daxil etdiyi epizodda qapıçı Bento kobud səhvə yol verdi. Bütün oyunboyu etibarlı təsir bağışlayan 26 yaşlı braziliyalı əlcək sahibi öz komanda yoldaşı İnyiqo Martineslə toqquşaraq topu əlindən buraxdı və avtoqol müəllifi oldu.

Bu ağlasığmaz qol üzündən Ronaldo və komanda yoldaşlarının belə desək, sevincləri boğazında qaldı. Hələ də Səudiyyə Ərəbistanında ciddi bir titul qazana bilməyən portuqaliyalı superulduz həmin an ehtiyat skamyada idi və böyük üzüntü yaşadı. ''Əl-Nəssr'' çempionluğu bir həftəliyə təxirə salmalı oldu.

Rəqiblərindən bir oyun artıq keçirən ''Əl-Nəssr'' xalını 83-ə yüksəltdi. Aktivində 78 xal olan ''Əl-Hilal'' çempionluq şansını davam etdirmək üçün növbəti turda evdə hökmən ''Neom''u yenməlidi. Bu baş verəcəyi təqdirdə çempionluğun taleyi son turda həll olunacaq.

Qeyd edək ki, ''Əl-Nəssr'' mayın 16-da ''Asiya Çempionlar Liqası 2'' adlı turnirin finalında ''Qamba Osaka'' ilə qarşılaşacaq. Bu üzdən Ər-Riyad təmsilçisi 33-cü turun oyununu mayın 7-də keçirib və ''Əl-Şabab''ı səfərdə 4:2 məğlub edib.