Səudiyyə Ərəbistanı çempionatının 28-ci turunda lider ''Əl-Nəssr'' ''Əl-Oxdud''un qonağı olub.

"Football-plus.az" xəbər verir ki, heyətində Burak İncə, Gökhan Gül və Koray Güntər kimi futbolçular olan ortabab ''Əl-Oxdud'' ulduzlar toplusu ''Əl-Nəssr''ə müqavimət göstərə bilməyib. Kriştiano Ronaldo 15-ci dəqiqədə fərqlənməklə həm qələbənin əsasını qoyub, həm də peşəkar karyerasının 968-ci qolunu vurub. Yekun nəticəni Ronaldonun həmyerlisi Joao Feliş müəyyənləşdirib və ''Əl-Nəssr'' bu maneəni 2 cavabsız qolla keçib.

Ər-Riyad təmsilçisi sona 6 tur qalmış ən yaxın rəqibini 5 xal qabaqlamaqla inamlı şəkildə turnir cədvəlinə başçılıq edir. Kriştiano əmin addımlarla Səudiyyə Ərəbistanı karyerasının ilk çempionluğunu doğru şığıyır. Onun komandası çempionatda ardıcıl 14-cü, bütün turnirlərdə isə ardıcıl 16-cı qələbəsini qazandı!

İştirak etdiyi son 10 çempionat oyununda aktivinə 9 qol, 1 məhsulda ötürmə yazan portuqaliyalı superulduz 24 qolla bombardirlər yarışında 3-cü pillədə qərarlaşıb. Onu 26 qolla ''Əl-Qədisiyə''nin üzvü Xulian Kinyones və 28 qolla ''Əl-Əhli''nin forvardı Ayven Touni qabaqlayır.