Səudiyyə Ərəbistanı çempionatında 30-cu turun mərkəzi oyununda Kriştiano Ronaldonun şərəfini qoruduğu ''Əl-Nəssr'' Kərim Benzemanın şərəfini qoruduğu lider ''Əl-İttihad''ı qəbul etdi.

''Əl-Nəssr'' çempionluq yolunda ''Əl-İttihad''a zərbə vura bilərdi. Çünki ikinci pillədəki ''Əl-Hilal'' turu qələbə ilə tamamlayaraq fərqi 3 xala endirmişdi. ''Əl-Nəssr'' ilk yarını ideala yaxın keçirərək Sadio Mane və Ayman Yəhyanın qolları ilə fasiləyə 2:0 üstün yollandı. Amma qonaqlar bu nəticə ilə barışmaq istəmədilər. İkinci hissənin əvvəllərində fransalı ulduzlar səhnəyə çıxdı. Əvvəlcə Benzema fərqi minimuma endirdisə, çox keçmədən Kante hesabı 2:2 etdi. Ronaldo əl-qol hərəkətləri ilə müdafiə xəttini ''yuxudan oyatmağa'' və ruhlandırmağa çalışdı. Amma bunun bir faydası olmadı. Əvvəlcə 2 topluq üstünlüyü əldən verən meydan sahibləri, son anlarda hətta heç-heçəni də qoruya bilmədilər.

Hussem Auarın əsas vaxta əlavə olunmuş 4-cü dəqiqədə vurduğu qol qonaqlara qələbə qazandırdı. ''Əl-İttihad'' sona 4 tur qalmış ən yaxın izləyicisi ilə 6 xallıq fərqi qorumağa müvəffəq oldu. ''Əl-Nəssr'' isə bu məğlubiyyətlə hətta 4-cü pilləyə gerilədi. Ər-Riyad təmsilçisi bu gedişlə gələn mövsüm üçün hətta Asiya Çempionlar Liqasından da kənar qalacaq.

Kriştiano ardıcıl ikinci önəmli qarşılaşmada meydanı qolsuz tərk etdi. O, Asiya ÇL-in yarımfinalında ''Kavasaki Frontale'' ilə görüşdə (2:3) də fərqlənə bilməmişdi. Onun aktivində son 4 rəsmi oyunda cəmi 1 qol var. "Ər-Riyad" klubunun fanatları son məğlubiyyətin ardından sosial şəbəkələrdə Ronaldoya etirazlarını bildirərək ona başqa kluba yollanmağı məsləhət gördülər.