Ukrayna çempionatının 27-ci turunda ''Şaxtyor'' ''Poltava''nın qonağı oldu.

"Football-plus.az" xəbər verir ki, Arda Turanın çalışdırdığı Donetsk təmsilçisi Lvovda oynanılan qarşılaşmada 4:0 hesabı ilə üstün oldu. Sona 3 tur qalmış ən yaxın rəqibi ilə xal fərqini 11-ə yüksəldən ''Şaxtyor'' son 4 ildə 3-cü, tarixinin 16-cı çempionluğunu qazandı. 17 çempionluğu olan əzəli rəqib Kiyev ''Dinamo''su ilə fərq minimuma endi. Komandanın çempionatda məğlubiyyətsiz seriyası 19 oyuna yüksəldi.

''Şaxtyor'' bu mövsüm Ukrayna premyer-liqasında yeganə məğlubiyyətini oktyabrda - 8-ci tur çərçivəsində LNZ ilə ev oyununda (1:4) yaşayıb. Bu, komandanın təxminən son 10 ildə daxili çempionatda ilk böyükhesablı məğlubiyyəti olmuşdu.

Arda Turan bu zəfər sayəsində adını tarixə yazdırdı. Belə ki, o, Avropanın aparıcı milli çempionatlarından birində çempionluq sevinci yaşayan ilk türkiyəli mütəxəssis oldu!

Xatırladaq ki, ''Şaxtyor'' bu mövsüm həm də 6 illik fasilədən sonra Avropa arenasında yarımfinala qədər irəliləməyi bacardı. Komanda Konfrans Liqasının yarımfinalında ''Kristal Pelas''a məğlub oldu.