Konfrans Liqasında finalçılar bəlli olub.

"Football-plus.az" xəbər verir ki, ilk görüşdə ''Kristal Pelas''a 1:3 uduzmaqla işini bir xeyli çətinə salan Arda Turanın çalışdırdığı ''Şaxtyor''un cavab oyununda sürprizə gücü çatmadı. London təmsilçisi bu dəfə doğma meydan 2:1 üstün oldu və ümumilikdə 5:2 qalib gələrək adını finala yazdırdı. ''Kristal Pelas'' finalda ''Rayo Valyekano'' ilə qarşılaşacaq. Final görüşü mayın 27-də Almaniyanın Leyptsiq şəhərində baş tutacaq.

Beləliklə, türkiyəli mütəxəssisin kollektivi üçün Avropa macərası finalın biraddımlığında başa çatdı. Arda nə qədər çalışsa da, bu turniri qazana bilmədi. Bununla belə o, avrokuboklarda yarımfinal görən 5-ci türkiyəli məşqçi kimi tarixə düşdü. Daha öncə bunu Adnan Süvari (''Göztəpə'', 1968/69), Mustafa Dənizli (''Qalatasaray'', 1988/89), Fatih Terim (''Qalatasaray'', 1999/00) və Aykut Kocaman (''Fənərbaxça'', 2012/13) bacarmışdı. Özü də Arda Turan bunu əcnəbi klubun başında bacaran ilk türkiyəli məşqçi oldu!

Ümumilikdə onun Ukraynada ilk mövsümünü uğurlu saymaq olar. ''Şaxtyor'' daxili çempionatda çempionluğu rəsmiləşdirmək üzrədi. Elə 6 illik fasilədən sonra Avropada yarımfinala yüksəlməyi də uğur saymaq olar.

Donetsk təmsilçisi sonuncu dəfə 2019/20-də AL-də bu mərhələyə qədər irəliləmişdi.